Twitter ўз таркибидан тақиқланган контентларни олиб ташламаса, бир ой ичида тармоқ Россияда суд қарорисиз ҳам блокланиши мумкин. Россия ОАВни назорат қилувчи федерал хизмати («Роскомнадзор») Twitter’дан кейин бошқа йирик ижтимоий тармоқларнинг тезлигини ҳам пасайтиришни истисно этмаяпти. Бу ҳақда муассаса бошлиғининг ўринбосари Вадим Субботинга таяниб, Meduza хабар берди.
Субботиннинг айтишича, ҳозирча «Роскомнадзор» «тақиқланган контентларни олиб ташлаш бўйича Twitter томонидан аниқ қадамларни қайд этмаяпти» ва «муассаса ходимларида музокаралар олиб боришга ҳалиям вақт бор».
«Бошқа сайтлар ҳам Россия қонунларини бузса ва ‘Роскомнадзор’ талабини бажармаса, биз уларга нисбатан техник чоралар (тезлигини пасайтириш, кейин блоклаш) кўришни истисно қилмаймиз», — деди Субботин.
Расмийнинг сўзларига кўра, ҳозирда Facebook, YouTube ва Instagram сингари йирик ижтимоий тармоқлар ва хизматларга қарши тақиқланган маълумотларни ўчирмаслик билан боғлиқ маъмурий ишлар олиб борилмоқда.
«Маъмурий баённомалар тузиб қўйилган бўлиб, биринчи қаторда, жарима солиш, иккинчи қаторда — техник чоралар, яъни ҳозирда Twitter мисолида кўриб турганингиздек, тармоқларни Россия қонунларига риоя қилишга мажбурлашга қаратилган трафик тезлигини пасайтириш чоралари турибди. Бу параллел жараёнлардир», — деди Субботин.
Эслатиб ўтамиз, «Роскомнадзор» 10 март куни эрталаб Россияда Twitter тезлигининг пасайиши бошланганини эълон қилди. Муассаса ўз ҳаракатларини 2017 йилдан бери ижтимоий тармоқнинг ноқонуний маълумотларни ўз ичига олган уч мингдан ортиқ хабарни ўчирмагани билан оқлади.
Ушбу хабарларнинг фонида Россияда кўплаб давлат интернет ресурслари, шу жумладан, Кремль, ҳукумат, Давлат думаси, Федерация кенгаши ва «Роскомнадзор»нинг веб-сайтлари ишламай қолди. «Роскомнадзор»нинг таъкидлашича, бунга расмий сабаб «Ростелеком»даги носозликлар бўлиб, Twitter’нинг секинлашувини унга ҳеч қандай алоқаси йўқ.
Аввалроқ TikTok ўз жонига қасд қилишни тарғиб қилувчи видеороликларни блоклаётганини маълум қилган эди. 2 март куни Россиянинг бир қатор шаҳарларида, шу жумладан, Москвада мактаб маъмурияти ота-оналарга ижтимоий тармоқларда ўспиринларнинг ўз жонига қасд қилишига чақирувчи видеороликлар пайдо бўлаётгани тўғрисида огоҳлантирувчи хабарлар юборган. «Роскомнадзор» томонидан TikTok’да бундай видеороликларнинг тарқалгани тасдиқланди ва кузатувчи органларнинг аралашувидан сўнг ижтимоий тармоқ ушбу контентларни тармоқдан олиб ташлаган