Озарбайжон ўз мажбуриятларига мувофиқ барча ҳарбий асирларни Арманистонга топширди. Бу ҳақда 15 март, душанба куни мамлакат ташқи ишлар вазири Жайхун Байрамов Швеция ташқи ишлар вазири ҳамда Европа Хавфсизлик ва ҳамкорлик ташкилотининг амалдаги раиси Анн Линде билан музокаралар якуни бўйича ўтказилган брифингда айтиб ўтди, деб ёзади «ТАСС».
Жайхун Байрамов
Фото: «ТАСС»
«Мазкур масалада Озарбайжон давлатининг позицияси жуда очиқ ва равшан. Биз 2020 йилнинг 9 ноябрида тузилган уч томонлама битимга мувофиқ Қорабоғдаги ҳарбий ҳаракатлар пайтида ва улар бошланишидан олдин олиб кетилган барча ҳарбий асирларни Арманистонга топширдик», — деди Озарбайжон вазири.
Байрамовнинг таъкидлашича, Озарбайжон ҳарбий асирларни Арманистонга қараганда эртароқ ҳаттоки ҳарбий ҳаракатлар пайтида ҳам топширишни бошлаган.
Ҳозирда Озарбайжонда сақланаётган арманистонлик ҳарбий хизматчиларга тўхталар экан, ташқи ишлар вазири уларнинг ҳарбий асирлар ҳисобланмаслигини таъкидлади, чунки улар ҳарбий ҳаракатлар пайтида ҳибсга олинмаган.
«Бу одамлар жанговар ҳаракатлар тугагандан ва уч томонлама битим имзоланганидан сўнг, аниқроғи, 2020 йил 26 ноябрда қўлга олинган. Улар Арманистоннинг Ширак вилоятида тайёргарликдан ўтиб, Қорабоғга кўчирилиб, Озарбайжон ҳарбийлари ва тинч аҳолининг ўлимига сабаб бўлган жиноятлар содир этган. Уларга қарши тергов ҳаракатлари давом этмоқда», — дея қўшимча қилди вазир.
Эслатиб ўтамиз, Тоғли Қорабоғдаги низо 2020 йил сентябрда кучайди. 2020 йил 10 ноябрь куни Россия, Озарбайжон ва Арманистон Тоғли Қорабоғда тинчлик ҳақида битим имзолади. Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади.
Аввалроқ Озарбайжон Тоғли Қорабоғда халқаро аэропорт қуришни бошлагани ҳақида хабар берилганди.
