Саида Мирзиёевадан Асал Шодиевагача: «Музей қандай тузилган» болалар китобининг тақдимоти бўлиб ўтди (фото)

Тошкент Политехника музейида 10 март, чоршанба куни «Музей қандай тузилган» китобининг тақдимоти бўлиб ўтди. Бу ҳақда «Дарё» мухбири хабар бермоқда.

Маросимда қайд этилишича, ушбу болалар китобининг ўзбек тилидаги мослаштирилган таҳрири Маданият вазирлиги ҳузуридаги Маданият ва санъатни ривожлантириш жамғармаси ҳамда Латвиядаги АBC Design нашриёти билан ҳамкорликда чоп этилган.

Тадбир аввалида Маданият вазирлиги ҳузуридаги Маданият ва санъатни ривожлантириш жамғармаси Кенгаши раисининг ўринбосари Саида Мирзиёева нутқ сўзлади.

«Азиз дўстлар, бугун эътиборингизга кичик, аммо шу билан бирга ўзига хос лойиҳани тақдим этмоқчимиз. Биз яшаётган юқори технологиялар даврида болаларнинг музейлар ва бошқа маданий объектларга бўлган қизиқишини сақлаб қолиш тобора қийинлашиб бормоқда. Шуни англаб, тушунган ҳолда ушбу китобни болажонлар ва ота-оналар эътиборига ҳавола қилишга қарор қилдик.

Мазкур китобни ўзим ҳам қўлимга тушган заҳоти катта қизиқиш билан, мириқиб ўқиб чиқдим. Унда музей экспонатлари, суратлардаги персонажлар ўзлари ҳақида эркин ва содда тилда ҳикоя қилади. Унинг ёрдамида сиз музей ортидаги ҳаёт, омборхона, картиналар қандай сақланиши, реставрация қилиниши, қай тарзда залга қўйилиши тўғрисида маълумотга эга бўласиз.

Мен болаларнинг эркин ва кучли ички мотивация ёрдамида билим олишлари тарафдориман. Баъзан фарзандларимнинг суҳбатларини тинглай туриб, қайсидир маънода улар билим борасида мендан ўзиб кетишганини ҳис этаман. Аслида, мен учун бундан ортиқ қувонч йўқ.

Болажонлар қалбида тарихга, санъат ва маданиятга иштиёқ ҳамда муҳаббат пайдо бўлишида ушбу китоб катта аҳамият касб этишига ишонаман», — деди Саида Мирзиёева.

Шунингдек, маросимда мактабгача таълим вазири Агриппина Шин, халқ таълими вазири Шерзод Шерматов ҳамда Маданият вазирлиги ҳузуридаги Маданият ва санъатни ривожлантириш жамғармасининг ижрочи директори Гаяне Умеровалар ҳам китоб тўғрисида ўз фикр-мулоҳазаларини билдирди.

Маълум қилинишича, музейлар тарихи ҳақида болалар учун иллюстрацияларга бой мазкур китобда рассом Давид Бём асарларидан фойдаланилган, матн муаллифлари: Ондржей Хробак, Ростислав Коричанек ва Мартин Ванек. Энциклопедия катта альбом шаклида тузилган бўлиб, у ажойиб иллюстрациялар ва махсус топишмоқлардан иборат. Китобда кўп жиҳатли маълумотлар ҳам мавжуд.

«Музей қандай тузилган» китоби Моравия галереяси (Брно, Чехия)нинг ташаббуси билан биринчи марта нашр қилинган. Китобнинг рус тилидаги таҳрири «Гараж» замонавий санъат музейи ва «Ad Marginem» нашриётининг қўшма босма дастуридир. Ушбу китоб Болоньяда ўтказиладиган халқаро болалар китоби ярмаркасида (Bologna Cilddren’s Book Fair) ғолиб бўлган.

Халқ таълими вазири Шерзод Шерматов ОАВ вакилларига берган интервьюсида ушбу китоб болаларни музей ва бошқа маданий муассасаларга ошно қилишда муҳим роль ўйнашини қайд этди.

«Ҳозир тўртинчи саноат инқилоби бошланган даврда кўплаб касбларда ишни робот бажармоқда. Агар болаларимиз бу замонда рақобатбардош бўлишини хоҳласак, уларда робот бажара олмайдиган кўникмаларни шакллантиришимиз керак. Бундай хислатлар ижодкорлик ва креативлик кабилардан иборат.

‘Музей қандай тузилган’ китоби айнан шундай йўналишда болалар билим олишига ёрдам беради.

Музейга бориш деганда график қилиниб, ҳамма йиғиб олиб борилади. Лекин бундай ташрифлар болаларга қанчалик қизиқ бўлган? Музейлар ҳақида бугун тақдимоти ўтказилаётган китобни ўқиган болаларнинг ўзи уларга қизиқади. Бунинг билан ўсиб келаётган болалар маданият истеъмолчиси сифатида шаклланади, музейларга оиласини ҳам олиб боради ва музейга келиб ҳордиқ чиқариш оилавий анъанага айланади», - деди Шерматов.

Китобнинг ўзбек тилидаги мослаштирилган таҳририга И.В. Савиский музейининг коллекциясидан Александр Николаев (Уста Мўмин), Виктор Уфимсев, Александр Шевченко, Николай Карахан, Евгений Лисенко, Александр Волков каби машҳур рассомларнинг асарлари киритилган.

Бундан ташқари, китобдан Дамир Рўзибоев, Вячеслав Усеинов ва Жолдасбек Қуттимуратов каби Ўзбекистон тасвирий санъатининг замонавий вакиллари асарлари ҳам ўрин олган.

Тақдимотда иштирок этган таниқли актриса Асал Шодиева «Дарё» мухбири Миролим Исажоновга берган интервьюсида ушбу китоб ҳақида ўз фикрларини билдирди:

«Камолиддин Беҳзод номидаги миллий рассомлик ва дизайн институтида ўқиганим боисми, музейларга саёҳат қилиш, улар тўғрисида маълумотларга эга бўлишга жуда қизиқаман. Ушбу китоб ранг-баранглиги ва расмларга бойлиги билан эътиборимни тортди. Айнан шу жиҳатлар сабаб ҳам болажонларда китобга нисбатан қизиқиш уйғонади, деб ўйлайман. ‘Музей қандай тузилган’даги маълумотлар уни ўқиган одамнинг, айниқса, болаларнинг хотирасида узоқ йилгача сақланиб қолиши шубҳасиз.

Фарзандим ҳали кичкина, аммо унга бу китобдаги расмларни кунора кўрсатиб, санъатга иштиёқини ошириб бориш ниятидаман. Ҳарф таний бошлаган вақтидан эса музейлар ҳақидаги қизиқарли маълумотлар билан таништираман. Қисқаси, бу китоб жуда ҳам фойдали қўлланма бўлибди».

Тақдимотдан сўнг болалар учун рангли қоғозлардан турли нарсалар ясаш бўйича маҳорат дарси ўтилди. Шунингдек, иллюзион шоу ҳам ташкил этилди.