11 март куни Янгийўл шаҳрида «Бекободцемент» АЖнинг масофавий ишлаб чиқариш бўлинмаси – Янгийўл цементни янчиш станциясининг очилишига бағишланган тақдимот маросими ўтказилди. Тадбирда раҳбарият вакиллари, амалдаги ва бўлғуси ҳамкорлар ҳамда ОАВ вакиллари қатнашди. Тадбир ишлаб чиқариш майдони бўйлаб кўргазмали экскурсия билан якунланди.
«Бекободцемент» АЖнинг сифат бўйича директори Елена Кошевая завод фаолияти, цемент янчиш станцияси, ишлаб чиқарилаётган маҳсулот ва жорий этилган инновациялар ҳақида батафсил гапириб берди.
«Янгийўл цемент янчиш цехи Ўзбекистондаги энг ёши улуғ заводлардан бири – «Бекободцемент» АЖ таркибига киради. Бу йил корхона ўзининг 95 йиллик юбилейини нишонлайди. Асосий истеъмолчиларимиз Тошкентда ва Тошкент вилоятида бўлгани учун биз айнан Янгийўлда цемент янчиш станциясини очишга қарор қилдик. Цехнинг ишга тушиши логистика билан боғлиқ муаммоларимизни ҳал қилишга ва маҳсулот етказиб бериш борасида чаққонроқ бўлишимизга имкон беради. Янгийўлдаги цемент янчиш станцияси ўз фаолиятини расман шу йил январь ойида бошлади. Биз бир йил давомида рецептурани тўғрилаб чиқиш ва уни «оқимга» қўйиш устида ишладик. Маҳсулот билан бозорга чиқиш учун жуда катта тайёргарлик ишлари олиб борилди. Энди «Бекободцемент» АЖ маҳсулотини харид қилувчи мижоз сифатни ҳам сотиб олади.
Маҳсулотимиз ассортименти катта, масалан, сульфатга чидамли цемент – у тажовузкор муҳитларга чидамли бўлган қурилиш материалига эҳтиёжи борлар учун мўлжалланган. ПЦ 400, Д 20, ППЦ 400 маркасидаги цементларни ишлаб чиқарамиз, монолит уй қурилиши соҳасида ишлайдиганлар учун маркаси юқори бўлган цементимиз бор. Шунингдек, 500 маркали цементни ҳам ишлаб чиқаряпмиз. Айни пайтда бундай цемент Ўзбекистонга қўшни мамлакатлардан олиб келинмоқда. Маҳаллий ишлаб чиқарувчилар ҳам сифати ундан қолишмайдиган маҳсулотни ишлаб чиқариши мумкин.
Корхона қуввати суткасига 3300 тонна цементни, йиллик қувват эса 1 миллион тонна маҳсулотни ташкил қилади. Бу йил 700 минг тонна цемент сотишни режалаштирганмиз. Корхонада 150 та иш ўрни яратилган бўлиб, уларнинг 85 фоизини Янгийўлдаги ишчилар ташкил қилади. Маҳаллий аҳоли бандлигини таъминлаш биз учун принципиал масала эди», — дейди Елена Кошевая.
«Бекободцемент» АЖ лабораторияси ва Янгийўл цемент янчиш станцияси цемент, бетон таҳлилини ўтказиш учун ускуналар билан тўлиқ жиҳозланган ҳамда ўқитилган, юқори малакали ходимлар билан таъминланган. 2020 йилда лабораторияни ривожлантиришга 600 000 АҚШ долларидан ортиқ маблағ йўналтирилди. Хомашё материаллари, қўшимчалар ва маҳсулотни нафақат кимёвий таркиби бўйича, балки асосий минерал фазаларни ўз ичига олиши бўйича ҳам тайёрлаш ва таҳлил қилиш учун ускуналар харид қилинди.
Лаборатория ҳар йили O’zDSt ISO/IEC 17025 талабларига мувофиқлик бўйича аккредитациядан ўтади.
Келажак режалари
Корхонанинг яқин режаларида ўз истеъмолчиларини техник жиҳатдан қўллаб-қувватлаш даражасини батафсил ҳамроҳлик қилишгача кўтариш, бунда назорат, қурилиш майдони жойлашишидан қатъий назар, бевосита ўша ернинг ўзида амалга ошириш кўзда тутилган. Шунингдек, мобил қурилиш лабораторияси ҳам шакллантирилади.
Лабораториянинг мақсади мобил бригаданинг жойларга чиқиб, беғаразлик асосида бетон қоришмалар ва грунтлардан намуна олиш ҳамда экспресс таҳлилларни ўтказишдан иборат.
«‘Бекободцемент’ АЖ билан ҳамкорлик қилаётганимизга ҳали кўп бўлгани йўқ, бунга 3 ойлар бўлиб қолди. Бизнес бўйича ҳамкасбларимиз уларни сифатли цемент ишлаб чиқарувчи, ишончли ҳамкор сифатида тавсия этган эди. Қурилиш компаниямиз цементнинг билдирилган сифатга мувофиқлиги бўйича ўз лаборатория тадқиқотини ўтказди.
Бугун цемент янчиш станцияси бўйлаб экскурсияда бўлганимиздан ва ишлаб чиқариш жараёнини шахсан кўриб, ўзимизни қизиқтирган тафсилотларни билиб олганимиздан жуда мамнунмиз. Бу етказиб бериладиган товарлар ва хизматлар сифатига асосланган узоқ муддатли ҳамкорлик бўлишига умид қиламиз», — дейди Александр Хамзин, «Бетон Қурилиш Сервис» МЧЖ директори.
Реклама ҳуқуқи асосида.
Изоҳ (0)