Марказий банкнинг базавий прогнозларига кўра, 2021 йил якуни бўйича инфляция 9—10 фоиз бўлиши кутилмоқда, деб ёзмоқда Spot.
Қайд этилишича, қуйидаги бир неча омиллар ҳисобига нархлар кўтарилишини жиловлаш мумкин:
- қатъий пул-кредит шароитларини сақлаб қолиш;
- карантин чоралари таъсирини босқичма-босқич тугатиш;
- сўмнинг 2020 йил апрелидаги кескин қадрсизланиши таъсирининг пасайиши.
Нархларнинг умумий даражасига акциз солиғининг кўтарилиши ва озиқ-овқат маҳсулотлари нархининг мавсумий ўсиши ҳам таъсир қилиши мумкин. Яна бир хатар келгуси ойларда сезиларли ўсиш кутилаётган қурилиш соҳаси билан боғлиқ — цемент ва бошқа қурилиш материаллари нархларининг ўсиши кўпинча бошқа нарсаларнинг ҳам нархи кўтарилишига олиб келади.
Шу муносабат билан Марказий банк рақобатни кучайтириш ҳисобига товар ва хизматлар ҳажмини ошириш зарур, деб ҳисоблайди.
Аввалроқ Марказий банк 2021 йилда инфляция 11—12,5 фоиз атрофида бўлишини прогноз қилган, буни иқтисодиётда вужудга келаётган вазият ва давом этаётган пандемия шароитидаги ноаниқлик билан изоҳлаганди. Марказий банк Молия вазирлигининг прогнозларига қарамай, 2023 йилда инфляция 5 фоизга етишига ишонмоқда.
Изоҳ (0)