Чеченистон раҳбари Рамзан Қодиров ва унинг оиласини қўриқлаш учун 2017 йилдан бери бюджетдан йилига 200 миллион рубль (2 719 153 доллар)дан жами бир миллиард рубль (13 593 402 доллар) маблағ сарфланган. Бу ҳақда давлат харидлари маълумотлари ва «Контур.Фокус» базасига асосланиб, Meduza хабар берди.

Фото: tvc.ru

Мазкур маблағ эвазига Чеченистон раҳбари ва унинг қариндошлари 388 нафардан 430 нафаргача Россия гвардияси аскарлари томонидан қўриқланган.

2021 йил февралида Қодировнинг иш қароргоҳига, шунингдек, унинг оила аъзоларига тегишли шахсий уйларга хизмат кўрсатадиган муассасалар Росгвардия билан бир йил муддатга умумий қиймати 201,4 миллион рубль (2 737 026 доллар) бўлган бир нечта шартномалар тузди. Маблағнинг ярмидан кўпроғи — 102,1 миллион рубль (1 387 646 доллар) Рамзан Қодировнинг онаси Аймани Қодирова ва унинг оиласини ҳимоя қилиш учун масъул муассаса томонидан ажратилган.

Нашрнинг қайд этишича, 2017 йилда Чеченистон идоралари 101,6 миллион рублга (1 380 744 доллар) 200 нафар қўриқчини ёллаган: 62 киши Чеченистон раҳбарининг қароргоҳини, яна 62 киши Қодировлар оиласининг шахсий уйини қўриқлаш учун юборилган, қолганлари Грознийдаги Қодиров маъмурияти биносини кузатиш билан банд бўлган.

Кейинчалик муҳофаза қилинадиган объектларнинг манзиллари харидлар ҳақидаги ҳужжатлардан олиб ташланган. Шу билан бирга, ҳужжатларда «Чеченистон Республикаси биринчи президенти А.А. Қодировнинг бева аёлининг ижтимоий ва бошқа кафолатлари тўғрисида»ги қонунга мувофиқ муҳофаза қилинадиган объект номлари қолган. Ушбу қонунга биноан Аймани Қодирова ва унинг оила аъзолари хавфсизлик билан таъминланган, шунингдек, Қодировнинг онаси коммунал тўловлардан озод қилиниб, унга қарилик нафақасининг 23 баравари миқдорида ойлик нафақа тайинланган ҳамда бепул тиббий ва транспорт хизматлари кўрсатилган.

Таққослаш учун, Чеченистон Федерал солиқ хизматининг йиллик ҳимояси учун бюджетдан ажратилган маблағ 6,7 ​​миллион рубль (91 053 доллар), республикадаги барча судларнинг ҳимояси учун эса 26 миллион рублдан (353 308 доллар) ошмайди.

Аввалроқ Рамзан Қодировнинг 30 ёшли қариндоши Хас-Магомед Қодиров Грозний шаҳар мэри лавозимига тайинланган эди. Шунингдек, Чеченистонда Қодиров ва унинг қариндошлари шарафига номланган 346 та кўча борлиги ҳамда Рамзан Қодировнинг «қатъий қаршилиги»га қарамай, Чеченистонда Рамзан Қодиров номли масжид қурилиши ҳақида хабар берилганди.