Баъзида мода мураккаб ва уларни тушуниш мумкин эмасдек туюлади. Харид қилинган кийимлардаги тушунарсиз деталлар ва уларни нима қилиш ҳақидаги маълумотлар эса сизга бу борада ёрдам бериши мумкин.
Нима учун кийим чўнтаклари тикилган (ёпиқ) бўлади?
Жинси, пальто, пиджак ва юбкалардаги чўнтакларнинг қўл соладиган қисми тикиб қўйилганига кўзингиз тушган бўлса керак. Гап шундаки, дўконда кийим кийиб кўриш жараёнида харидорлар унинг чўнтагига қўл солиб кўришни яхши кўради. Икки-уч марта ушбу ҳолат такрорланиши эса матонинг чўзилиши ва кўримсиз ҳолга келишига сабаб бўлади. Айнан шунинг учун ҳам ишлаб чиқарувчилар бундай усулни ўйлаб топган. Харидор сотиб олганидан кейин, хоҳишига қараб чўнтакнинг чокларини очиши мумкин.
Кроссовкани кир ювиш машинасида ювса бўладими?
Иложи борича бундай қилиш тавсия қилинмайди. Чунки ювиш жараёнида пойабзал барабанларга урилади ва ҳолат ёмонлашади. Қолаверса, сувнинг таглик ичига киргани сабаб унинг амортизацион хусусиятига зарар етиши мумкин. Яхшиси уни қўлда ювинг ёки махсус тозалайдиган марказларга олиб боринг. Боғичларини эса алоҳида олиб ювишни унутманг.
Нима учун пойабзал қутисига майда шарчали қоғоз пакет солинади?
Мазкур пакетчаларга силикагель — намлик ва ёмон ҳидни ўзига оладиган сорбент солинган бўлади. Уларни ташлаб юборишга шошилманг. Пакетчалар ёмғир ёки нам бўлган пойабзални тезроқ қуришига ёрдам беради. Бундан ташқари, телефон ёки бошқа техника сувга тушиб кетганида ҳам ёрдам бериши мумкин. Бунинг учун техниканинг атрофига мана шундай пакетчалар қўйиб, бир неча соатга қолдиринг.
Нима учун комплект кийимларда кичкина мато бўлаги қўшиб берилади?
Қўшимча сифатидаги бундай матолар тажриба учун бўлади. Яъни иссиқ сув, кир ювиш кукуни таъсирида кийимда қандай ўзгариш кузатилишини ушбу матода синаб кўрса бўлади.
Қандай либосларни кийим илгичда сақлаб бўлмайди?
Трикотаж ва жун матосидан тикилган либосларни кийим илгичда сақлаш, уларнинг шакли бузилиши ёки осилиб қолишига олиб келади. Бундай кийимларни шунчаки тахлаб шкафга қўйиш мумкин, ғижим бўлмайди. Шунингдек, узун либосларни кийим илгичга елка қисмидан илиб қўймаслик керак. Ғижим бўлгани сабаб ҳар сафар янгидан дазмол қилишга тўғри келиши мумкин. Яхшиси бундай либосларни шкафга ўртасидан букиб илиб қўйинг.
Кийимдаги қандай ёрлиқларни олиш, қайсиларни эса олмаслик керак?
Кийимдаги номсиз ишлаб чиқарувчилар томонидан тикилган ёрлиқларни олиб ташланг. Дизайнерларнинг бренд либослари «нашивка»лари эса бундан мустасно. Уларни бошқаларидан ажратиб олиш осон — қаттиқ ва сифатли матодан тикилган бўлади. Зўрға тикилган, бачкана ва илиниб тургандек бўлган ёрлиқлар эса керак эмас. Кийим харид қилганда унинг ташқи томонидаги ёрлиқни дарҳол олиб ташлаш керак, кейинроқ мато ранги ўзгариши, ёрлиқ олинганидан кейин эса фарқи билиниб, доғга ўхшаб қолиши мумкин. Кўринмай турадиган бўлса ва ноқулайлик келтириб чиқармаса, кийим ичидаги ёрлиқларни олиб ташлашга ҳожат йўқ. Олиб ташлаш ниятингиз бўлса, ундаги матони ювиш ва дазмоллаш ҳақида ёзилган тавсияларни қайд қилиб олинг ёки суратга туширинг.
Изоҳ (0)