Кийимлар кимёвий тозалаш марказига олиб борилганда одатда доғ билан боғлиқ қандай жараён ўтказилгани ҳақида сўралади. Аксарият жавоблар ижобий бўлиши табиий. Албатта, мутахассис бу ҳақда тўлиқ маълумотга эга бўлиши лозим, сабаби олиб борилган тозалаш ишлари тескари натижани ҳам бериши мумкин. Шунинг учун улар доғларни озиқ-овқат, косметика, тиббий, маиший ва бошқа турларга ажратади. Ҳар бир воситадан қолган доғ мато билан ўзаро таъсирлашади ва турли хилдаги эритувчиларни талаб этади.
Кийимларни доғ билан узоқ муддат қолдириш
Кўпчилик йўл қўядиган энг катта хато. Кийимдаги ҳар қандай доғни дарҳол бартараф этиш мумкин, бунинг учун вақтида ҳаракат қилиш керак. Аввало, бирор доғ пайдо бўлган кийимни ўша заҳоти ювишга одатланиш ёки кимёвий тозалаш марказларига олиб бориш зарур. Агар бу каби кийим бир ҳафта давомида ёки ундан кўпроқ муддатга доғ билан қолдирилса, уни бартараф этиш анча мураккаблашади.
Доғларни ишқалаш
Доғни ишқалаб кўриш натижасида мато толасининг ингичкалашиб кетгани ҳамда доғ атрофини хиралашганини кўриш мумкин. Бу билан фақатгина кийим матоси ва кўринишга зарар етказиши мумкин. Яхшиси, қоғоз сочиқ ёки тоза мато ёрдамида доғли ҳудудни юмшоқ ҳаракат билан тозалаш керак. Аммо қаттиқ чўтка ёки матони муштлаб ишқалаш мумкин эмас.
Доғларни тозалашни марказдан бошлаш
Кийимга тушган кичкина доғни унинг марказидан тозалаш натижасида зарарланган ҳудуд янада кенгайиб кетади. Шунинг учун ҳам тозалашни уларнинг чет қисмидан бошлаш керак. Ҳар томондан тартибсиз тозалаш эса уни хиралаштириши билан бирга кенгайтириб ҳам юборади.
Доғларни иссиқ сувда ювиш
Ҳеч қачон доғ юзасини иссиқ сув билан ювмаслик керак. Сув ҳарорати юқори бўлса, доғни олиб ташлаш осон кечади, деган фикр нотўғри. Сабаби юқори ҳарорат айрим доғларни матога зичроқ жойлаштиради. Иложи борича доғлар ўртача ҳароратдаги илиқ сувда ювилгани маъқул.
Оқартирувчи воситадан фойдаланиш
Оқартирувчи воситалар нозик матоларга зарар етказиши ҳақида унутмаслик керак. Агар кийим қимматбаҳо бўлса, у ҳолда ушбу қарордан воз кечган яхши. Юқорида айтилганидек, уй шароитида тозалаш имкони бўлган кийимларни махсус кимёвий тозалаш марказига олиб борган фойдалироқ.
Қимматбаҳо кийимлар устида лайфхаклар олиб бориш
Ижтимоий тармоқларда кийимлардаги доғни бартараф этишнинг турли хил усулини топиш мумкин. Лекин ушбу тажрибаларни эски кийимлар устида амалга ошириш тавсия этилади. Сабаби ҳар қандай кийимдан ҳам яхши натижани кутиб бўлмайди. Шунингдек, доғларни тирноқ тозалаш воситаси, бензин, спирт каби моддалар билан тозалаб кўришга уринмаслик керак. Улар мато билан қандай реакция киришишини фақатгина мутахассислар яхши билади.
Изоҳ (0)