Ўзбекистон Президенти Шавкат Мирзиёев ва Германия Федерал канцлери Ангела Меркель 12 март куни видеоанжуман шаклида учрашув ўтказади. Бу ҳақда Президент матбуот хизмати хабар қилди.
Икки мамлакат етакчилари Ўзбекистон билан Германия ўртасидаги кўп қиррали шерикликни янада кенгайтиришнинг долзарб масалаларини кўриб чиқишлари кўзда тутилган.
Олий даражадаги учрашувларда эришилган келишувларни амалга ошириш, конструктив сиёсий мулоқотни ривожлантириш, савдо-иқтисодий, инвестициявий, молиявий-техник ва маданий-гуманитар ҳамкорликка доир қўшма лойиҳа ва дастурларни илгари суриш масалаларига алоҳида эътибор қаратилади.
Музокараларда халқаро ва минтақавий аҳамиятга молик долзарб масалалар юзасидан ҳам фикр алмашилади.
Эслатиб ўтамиз, Ўзбекистон Президенти 2019 йил январь ойида расмий ташриф билан Германияда бўлди, ўша йилнинг май ойида эса Германия президенти Франк-Валтер Штайнмаер жавоб ташрифи билан Ўзбекистонга келди.
2020 йил якунларига кўра ўзаро товар айирбошлаш 829 миллион долларни ташкил этган, Ўзбекистонда Германиянинг 700 миллион доллардан зиёд инвестициялари ўзлаштирилган. Ўзбекистонда 200 га яқин қўшма корхона фаолият юритмоқда.
Изоҳ (0)