2021 йил охирига бориб Тошкентдаги барча ёқилғи қуйиш шохобчаларида электромобилларни қувватлантириш имконияти пайдо бўлади. Бу ҳақда пойтахт Транспорт бошқармаси бошлиғига таяниб, «Подробно» хабар берди.
«Вазирлар Маҳкамасининг 812-сонли қарори доирасида барча мавжуд ёқилғи қуйиш шохобчаларида электрокарлар учун қувватлантириш нуқталарини яратиш кўзда тутилган. Ўйлайманки, йил охирига қадар барчаси амалга ошади. Чунки тадбиркорларнинг ўзи бундан манфаатдор. Бугунги кунда электромобилларни олиб кираётган 10 та дистрибюторимиз мавжуд. Улар маҳаллий бюджет маблағларини кутиб ўтирмайди, ўзлари электр шохобчаларни ташкиллаштиради», — дейди Тошкент шаҳар Транспорт бошқармаси бошлиғи Анвар Жўраев.
Эслатиб ўтамиз, Ўзбекистонда 2020 йилда 2,9 миллион доллар сарфланиб, хориждан 131 та электромобил импорт қилинган. Таъкидлаш керакки, Ўзбекистонда электромобиллар импорти учун имтиёзлар амалда — улар учун бож ва акциз солиғи тўланмайди. Фақатгина тегишли йиғимлар ва ҚҚС тўланади.
Аввалроқ Ўзбекистондаги бир нечта компаниялар 2021—2023 йилларда автомобиллар, пикаплар, юк машиналари, микроавтобуслар ва бошқа автомобилларни ишлаб чиқариш ва йиғишни йўлга қўймоқчи эканлиги ҳақида хабар берилган эди. Президент йилига 50-60 минг дона ҳамёнбоп автомобиллар ва электромобиллар ишлаб чиқаришни йўлга қўйиб, автомобиль саноати учун сармоя киритиш зарурлигини таъкидлаган эди.
Изоҳ (0)