Тошкент шаҳар ИИББ ижтимоий тармоқларда бир аёл ўзининг вояга етмаган ўғлининг калтакланишида ИИО ходимини айблаётгани тасвирланган видеога изоҳ берди.
Интернет тармоқларида вояга етмаган М.Ж.нинг онаси томонидан қилинган мурожаат тарқалди. Унда аёл 16 ёшли вояга етмаган ўғли «Малика» савдо комплексида бўлган жанжалда гўёки Миллий гвардия ходимининг ёнини олганини, шунда Шайхонтоҳур тумани ИИО ФМБ ходимлари ўғлини ушлаб, уриб, дўппослаганини айтиб ўтган.
Пойтахт ИИББнинг маълум қилишича, 31 январь куни тахминан соат 21:00 ларда Юнусобод тумани Истиқлол кўчасида турган, юридик шахсга тегишли бўлган Damas русумли автомобилдан номаълум шахслар 25 миллион сўмлик мулкни ўғирлаган.
Мазкур ҳолат юзасидан Юнусобод тумани ИИО ФМБ томонидан Жиноят кодексининг 169-моддаси 2-қисми «а» банди (ўғирлик) билан жиноят иши қўзғатилган. Ўтказилган тезкор тергов ҳаракатлари давомида гумон қилинувчилар аниқланиб, ушланган. Улардан бири 19 ёшли Аурилло А. қамоққа олинган, 22 ёшли Алфреда Г.ни ушлаш чоралари кўрилмоқда. 16 ёшли М.Ж. вояга етмаганлиги инобатга олиниб, унга нисбатан озодликдан маҳрум қилиш билан боғлиқ бўлмаган эҳтиёт чораси танланган.
Таъкидланишича, ўғирланган буюмларнинг кўп қисми М.Ж.нинг яшаш жойида аниқланган ва олиб қўйилган.
Шундан сўнг, 9 февраль куни тахминан соат 16:20 ларда Шайхонтоҳур туманидаги «Малика» савдо мажмуаси ҳудудида хизмат олиб бораётган Тошкент шаҳар ИИББ ППХ ва Миллий Гвардия бошқармаси ходимларига 17 ёшли Хожиакбар С. ва Азизбек А. мурожаат қилиб, Азизбек сотмоқчи бўлган телефонни олиб қўйган шахсларга чора кўришларини сўраган. Гувоҳларнинг сўзларига кўра, савдо мажмуаси ҳудудидаги ҳолатда М.Ж. фаол иштирок этган.
Ҳуқуқни муҳофаза қилувчи орган ходимлари жабрланувчиларнинг сўзига кўра, гумон қилинувчини ушлаганида бир нечта фуқаро ўзларининг хатти-ҳаракатлари билан ходимларга ўз хизмат вазифасини бажаришига тўсқинлик қилиб, Миллий гвардия ходимига тан жароҳати етказган.
Мазкур ҳолат юзасидан Шайхонтоҳур тумани прокуратураси томонидан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) ва 277-моддаси (безорилик) аломатлари билан жиноят иши қўзғатилган.
Жанжалда иштирок этган шахслар аниқланиб, қонуний тартибда ушланган. Улар 26 ёшли Абдулазиз Э., 20 ёшли Абдулазиз Т., 24 ёшли Саидрасул Х., 40 ёшли Боходир И., 32 ёшли Исмоил М., шунингдек, вояга етмаганлар Д.М. ва М.Ж., яна бир шахснинг — 25 ёшли Г.Ш.нинг қаердалиги аниқланмоқда.
Ҳуқуқни муҳофаза қилувчи орган ходимлари жанжалнинг барча иштирокчиларини аниқлаш ва ушлаш чораларини кўраётган бир вақтда вояга етмаган М.Ж. яна гумон қилинувчи сифатида ички ишлар органлари ходимлари эътиборига тушган.
16 февраль куни Шайхонтоҳур тумани ИИО ФМБга 28 ёшли Зибогул А. ариза билан мурожаат қилиб, у таъмирлаш учун олиб борган телефонини олиб қўйган шахсга нисбатан чора кўришни сўраган. Аниқланишича, Зибогул А. телефонини таъмирлашдан сўнг қайтариб беришини сўраганида телефонини олган шахс унга тан жароҳати етказган. Натижада жабрланувчи 1-сонли Республика Клиник шифохонасига тиббий ёрдам учун мурожаат қилган. Кузатув камераларидан олинган тасвирларда аёлга тан жароҳати етказиш ҳолатлари акс этган ва аёл унга тан жароҳати етказган 16 ёшли М.Ж.ни таниб олган.
18 февраль куни 16 ёшли М.Ж.га нисбатан қамоқ эҳтиёт чораси қўлланилган. 2 март куни жиноят ишлари бўйича апелляция суди томонидан М.Ж.нинг онаси томонидан берилган аризага асосан қамоқ эҳтиёт чораси озодликдан маҳрум этиш билан боғлиқ бўлмаган бошқа эҳтиёт чорасига ўзгартирилган.
Юнусобод тумани ИИО ФМБ томонидан қўзғатилган ўғирлик факти билан боғлиқ жиноят иши, шунингдек, юқорида қайд этилган ҳолат юзасидан Шайхонтоҳур тумани ИИО ФМБ томонидан қўзғатилган жиноят ишлари Шайхонтоҳур тумани прокуратурасига ўрнатилган тартибда бирлаштириш учун юборилган.
«Шунинг учун 16 ёшли М.Ж. тергов идоралари томонидан гумон қилинувчи сифатида жалб қилиниб, унинг ҳуқуқ ва мажбуриятлари тушунтирилган бўлишига қарамасдан, тергов ҳаракатлари олиб борилаётган бир вақтда яна жиноят содир этаётганлигини инобатга олиб, унга нисбатан 2 март куни яна қамоқ эҳтиёт чораси танланган», — дейилади хабарда.
Бугунги кунда 16 ёшли М.Ж. Жиноят кодексининг 169-моддаси 2-қисми «в» банди (ўғирлик), 219-моддаси 1-қисми (ҳокимият вакилига ёки фуқаровий бурчини бажараётган шахсга қаршилик кўрсатиш), 277-моддаси 3-қисми «а» ва «г» бандлари (безорилик), 168-моддаси 2 ва 3-қисмлари (фирибгарлик)да кўрсатилган жиноятларни содир этганликда гумон қилинмоқда. Тергов идоралари томонидан 16 ёшли М.Ж.нинг бошқа жиноятларга алоқадорлиги текширилмоқда..
Изоҳ (0)