Монополияга қарши курашиш қўмитаси Ўзбекистон аэропортларида коронавирусга қарши ўтказилаётган экспресс-тестлар жараёни борасида кўплаб шикоятлар келиб тушаётганини маълум қилди.

Фото: «Дарё» / Мадина Нурман

Шу сабабли Ўзбекистонга кириб келувчи шахсларга арзон ва сифатли коронавирусга антиген экспресс-тест текширувларини ташкил этиш мақсадида Республика махсус комиссияси томонидан танлов асосида, жамоатчиликка эълон берган ҳолда лабораторияларни қайта жалб этиш чоралари кўрилади.

Аэропортлардаги тендер бўйича ҳужжатлар:

Шунингдек, яқин кунларда Тошкент ва Урганч аэропортларида тадбиркорлик субъектлари орасида тенг рақобат муҳитини яратишга қаратилган шартлар асосида танлов эълон қилиниши режалаштирилган. Ушбу хизмат турларини кўрсатиш имкониятига эга тадбиркорлик субъектларини танловда тенг шартлар асосида иштирок этишлари мумкин.

«Gazeta.uz»нинг ёзишича, танлов шартларига кўра, битта тест нархи (ҚҚС билан ҳисобланганда) қуйидагича бўлиши лозим:

  • Экспресс-тест — 100 минг сўмгача;
  • Талабалар учун экспресс-тест — 50 минг сўмгача;
  • ПЗР-тест — 200 мин сўмгача.

Белгиланган нархдан юқори бўлган таклифлар кўриб чиқилмайди.

Танлов якуни бўйича ўтказиш қобилияти соатига 500 йўловчидан ортиқ бўлган аэропортларга камида иккита лаборатория ўрнатилади. Айни вақтда Тошкент аэропортида тест олиш билан «Тиббиёт Дунёси» хусусий лабораторияси шуғулланмоқда.

Эслатиб ўтамиз, коронавирус кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига асосан, 2020 йилнинг 25 декабридан эътиборан Ўзбекистонга кириб келаётган шахслардан коронавирус инфекцияси антигенини аниқлаш экспресс тестини олиш жорий этилган.