Бирлашган Араб Амирликлари (БАА) коронавирусга қарши оммавий иммунитетга эришган биринчи мамлакат бўлиши мумкин. Чунки аҳолининг катта қисми вирусга қарши эмланиб бўлди. Бу ҳақда Al-Arabiya телеканалига таяниб «Интерфакс» хабар берди.
«Пандемияга қарши курашиш учун ҳукуматнинг мақсадли ҳаракатлари бўйича БАА тез орада бутун аҳолини вакцинация қилган биринчи мамлакатга айланиши ва шу билан оммавий иммунитетга эришиши мумкин», — деди Bareen халқаро шифохонасининг шошилинч тиббий ёрдам мутахассиси Фуад ар-Рахал.
Our World in Data онлайн нашрининг маълумотларига кўра, БАА аҳолисини коронавирусга қарши эмлаш даражаси бўйича Исроилдан кейин иккинчи ўринда турибди. Сўнгги маълумотларга кўра, БАА аҳолисининг 60 фоизидан кўпроғи шу кунгача камида бир дозада COVID-19 вакцинасини олган.
Фавқулодда вазиятларни бошқариш миллий агентлиги Twitter’да ёзишича, БАА ҳозиргача вирусга қарши вакцинанинг 6 миллиондан ортиқ дозасини етказиб берди ва 3,6 миллиондан ортиқ аҳоли коронавирусга қарши эмланди.
Экспертлар фикрига кўра, БАА пандемияга қарши кураш учун ўз вақтида чоралар кўрди. «COVID-19 вакциналари клиник синовлардан ўтиб, фойдаланиш учун маъқулланганда, БАА миллий эмлаш дастурини бошлаган бир нечта мамлакатлардан бири эди», — деди ар-Рахал.
Айни пайтда БААда тўртта — Россиянинг «Спутник V», Хитойнинг Sinopharm, Америка ва Германиянинг Pfizer-BioNTech, шунингдек, Оксфорд университети томонидан ишланган Англия ва Швециянинг AstraZeneca компанияси вакциналари мавжуд.
Изоҳ (0)