Андижон вилоятининг Андижон туманида собиқ хотини ва қайнотасини пичоқлаб ўлдирган эркак қўлга олинди. Бу ҳақда «Дарё» мухбири Умиджон Мамарасулов хабар берди.

Вилоят прокуратураси ахборот хизматининг аниқлик киритишича, воқеа 2021 йил 25 февраль куни соат 23:30 да Андижон туманининг «Қурама» маҳалласида содир бўлган.

Фуқаро Ў.Ҳ. таниши билан бирга собиқ турмуш ўртоғи У.Ж.нинг яшаш хонадонига спиртли ичимлик истеъмол қилган ҳолда келиб, гўёки хотинининг бошқа шахслар билан телефонда гаплашиб келаётганлигидан рашк қилганини айтган ва у билан ўзаро келишиб олмоқчилигини билдирган. Бироқ ўша вақтда собиқ қайнотаси Р.Ж. бундан хабар топган ҳамда келишмовчилик юзага келган. Ўзаро жанжал давомида Ў.Ҳ. ўзига тегишли чалабзар пичоғи билан собиқ қайнотаси ва хотинига оғир тан жароҳати етказган. Оқибатда собиқ қайнота воқеа жойида вафот этган.

Қотилликка қўл урган фуқаронинг собиқ хотини У.Ж. эса дастлабки тиббий ёрдамдан сўнг республика шошилинч тез тиббий ёрдам илмий маркази Андижон филиалига олиб келинган. Бироқ малакали тиббий ёрдам кўрсатилишига қарамасдан у шифохонада вафот этган.

Мазкур ҳолат юзасидан Ў.Ҳ.га нисбатан Жиноят кодексининг 97-моддаси 2-қисми, «а» банди (икки ёки ундан ортиқ шахсни қасддан ўлдириш) билан жиноят иши қўзғатилиб, вилоят прокуратурасининг ўта оғир жиноятларни тергов қилиш бўлими томонидан тергов ҳаракатлари олиб борилмоқда.