Хитойлик аёл 10 099 юань (1,562 доллар) тўлаб, 250 гигабайтли iPhone 12 Pro Мах’га буюртма берган. Аммо унга келган посилкадан телефон ўрнига олмали йогурт чиққан, деб ёзади Daily Star.
Хитойнинг Анхой провинциясида истиқомат қилувчи Лиу исмли аёл буюртмани Apple’нинг расмий сайти орқали амалга оширган. Компания ва етказиб бериш хизмати ушбу ҳолат юзасидан текширув ўтказишга қарор қилган бир вақтда маҳаллий полиция томонидан юз берган ҳодиса ўғрилик деб баҳоланган.
Воқеа юзасидан изоҳ берган ҳуқуқшунос Чжан Бо бу сайт фишинги билан боғлиқ бўлиши мумкинлигини таъкидлаган. У ижтимоий тармоқ фойдаланувчилари сохта илова ва сайтлардан эҳтиёт бўлиши кераклигини қўшимча қилган. Мутахассис, шунингдек, курьер келтирган маҳсулотни унинг олдида очиб, текшириб олишни, буюртма қилингандан бошқа нарса етказилган бўлса, полицияга мурожаат қилиш кераклигини айтиб ўтган.
Изоҳ (0)