Давлат солиқ қўмитаси томонидан солиқларни камроқ тўлаш мақсадида пул маблағларини нақдлаштириш билан шуғулланувчи 396 та корхонадан иборат шубҳали контрагентлар реестри тузилган, шунингдек, «нақдлаштирувчи корхоналар» хизматларидан фойдаланган 10 мингга яқин ташкилотлар рўйхати шакллантирилган эди. Қўмитанинг маълум қилишича, фаолияти шубҳали деб топилган корхоналар билан амалга оширилган битимларни ўрганиб чиқиш мақсадида тезкор равишда камерал солиқ текширувлари давом эттирилмоқда.
Хусусан, 2021 йилнинг 28 февраль ҳолатига республика бўйича жами 7240 та корхонада 728,8 миллиард сўмлик асоссиз ҳисоб («зачёт»)га олинган қўшилган қиймат солиғи (ҚҚС) суммаларига аниқлик киритиш бўйича камерал солиқ текширувлари якунланган.
Натижада:
- 7120 та, яъни 98,4 фоиз корхонада (728,8 миллиард сўм) «сохта» операцияларни амалга ошириш фактлари тасдиқланган;
- шундан 103 та ташкилотда (13,5 миллиард сўм) ҚҚС суммасини ноқонуний ҳисобга олиш факти қисман тасдиқланган;
- 116, яъни назорат тадбирлари ўтказилган 1,6 фоиз солиқ тўловчилар томонидан 18,6 миллиард сўмлик ҚҚС суммасини тўғри ҳисобга олганлиги ҳолатлари бўйича асословчи ҳужжатлар тақдим этилган.
Шунингдек, камерал солиқ текширувлари жараёнида 156 та корхона томонидан ҚҚС суммасини тўғри ҳисобга олиш билан боғлиқ йўл қўйилган бошқа ҳуқуқбузарликлар ҳам аниқланиб, уларга нисбатан 5,8 миллиард сўмлик солиқлар қўшимча ҳисобланган.
Эслатиб ўтамиз, қўмита солиқ тўловчилар учун 18 февралдан бошлаб қўмитада ҳам, барча солиқ идораларида ҳам фаолият кўрсатувчи ишчи гуруҳларини тузди. «Нақдлаштирувчи корхоналар» билан молиявий операцияларни амалга оширган тадбиркорлар камерал текширув ўтказиш бўйича мурожаат қилишлари мумкин.
Изоҳ (0)