Фото: Девор ва дарахт оқлаётган Қўқон ҳокими

Фарғона вилояти Қўқон шаҳар ҳокими Маруфжон Усмонов «2-Шалдирамоқ» маҳалласида ободончилик ҳашарида қатнашиб, ночор хонадонга ёрдам берди. Бу ҳақда «Халқ сўзи online» хабар берди.

Маълум қилинишича, шаҳарнинг Баҳмалбоп кўчаси, 57-хонадонда истиқомат қиладиган Солиевлар уйида ўтказилган ўрганиш натижасида бир уй, бир даҳлиз ва ошхона қурилиши бошлаб юборилган. «Ишсиз оила аъзолари ишга жойлаштирилиб, доимий даромад манбаси билан таъминланди. Оиланинг катта ўғли Ҳасанжон Солиевнинг тўй маросимини ҳомийлик асосида ўтказишга келишиб олинди ва тўйга тайёргарлик ишлари бошлаб юборилди», — дейилади хабарда.

Маруфжон Усмонов маҳаллани ободонлаштириш ишларида иштирок этиб, уйларнинг деворларини, дарахтларни оқлаган.

Маҳалла фаоллари шаҳар ҳокими билан бўлиб ўтган учрашувда «Обод маҳалла» дастури доирасидаги ишларда фаол иштирок этишларини билдирган.

Эслатиб ўтамиз, Президент Шавкат Мирзиёев 19 февраль куни Наманган вилоятига ташрифи чоғида «Бунёдкор» маҳалласида бўлган ва ичимлик суви йўқ, ички йўллар ёмон, атроф ободонлаштирилмаган ҳудуддаги аҳвол учун шаҳар ҳокими ва прокурорига танбеҳ берганди.