Наманган шаҳри Давлатобод туманида 18 ёшли йигитнинг телефонини олиб қўйиб, уни сотиб юборган мактаб ўқувчилари ушланди, деб хабар беради Тергов департаменти.
Маълум қилинишича, 24 февраль куни соат 19:30 ларда номаълум шахслар туманнинг Шифокорлар кўчаси ҳудудида 18 ёшли М.Э.ни тўхтатиб, юз қисмига бир маротаба уриб, унга тегишли нархи бир миллион сўмлик Huawei E62 русумли уяли алоқа воситасини тортиб олиб, ҳодиса жойидан яширинган.
Олиб борилган терговга қадар текширув ҳаракатлари давомида ушбу жиноятни 48-сонли мактабнинг 11-синф ўқувчилари 17 ёшли Ж.Ж., И.Х. содир этиб, талончилик йўли билан қўлга киритган телефон аппаратини 450 минг сўмга сотиб юборганлиги аниқланган ва улар процессуал тартибда ушланган.
Мазкур ҳолат юзасидан Давлатобод тумани ИИБ ҳузуридаги тергов бўлими томонидан Ж.Ж. ва И.Х.га нисбатан Жиноят кодексининг 166-моддаси 2-қисми «в» банди (талончилик) билан жиноят иши қўзғатилган.
Ҳозирда тергов ҳаракатлари давом этмоқда.
Маълумот учун, бу турдаги жиноятлар учун Жиноят кодексининг нормаларига кўра, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш жазоси тайинланади.
Аввалроқ Тошкентда 35 ёшли эркакни калтаклаб, телефонини олиб қўйган уч нафар шахс қўлга олингани, Марғилонда ўзидан бир ёш катта йигитнинг 4,1 миллион сўмлик телефонини олиб қўйган 5 нафар вояга етмаган болага нисбатан жиноий иш очилгани тўғрисида хабар берилганди.
Изоҳ (0)