Pfizer ва BioNTech вакцинасининг ташиш ва сақлаш ҳароратини пасайтиришга рухсат берилди

Pfizer ва BioNTech компаниясининг коронавирусга қарши вакцинаси 14 кун давомида оддий музлаткич камерасида 15 даража совуқдан 25 даража совуққача бўлган ҳароратда ташилиши ва сақланиши мумкин. Бу ҳақда АҚШнинг Озиқ-овқат ва фармацевтика агентлигига (FDA) таяниб «Korrespondent.net» хабар берди.

Аввалроқ ишлаб чиқарувчилар вакциналарнинг махсус 60 даража совуқдан 80 даража совуққача ҳароратда сақланиши кераклигини айтган эди. Фақат эмлашни бошлашдан беш кун олдингина вакцинани оддий музлаткичларда сақлашга рухсат берилар эди.

FDA’нинг таъкидлашича, янги талаблар манфаатдор томонлар ва муассасаларга вакциналар етказиб беришни осонлаштиради, чунки энди улар учун оғир музлаткичлар ёки махсус қуруқ музли идишлар талаб қилинмайди.

Маълумот учун, бир ҳафта олдин компания ўз вакцинасини сақлаш ва ташиш бўйича маълумотларини янгилаш учун FDA’га ариза берган эди.

Аввалроқ Pfizer ва BioNTech COVID-19 вакцинасининг учинчи дозасини синовдан ўтказишни бошлагани ҳақида хабар берилган эди.