Ўзбекистонда дам олиш кунлари ҳаво ҳароратининг кўтарилиши давом этади

Ушбу ҳафтанинг иш кунлари охирида Ўзбекистон ҳудуди Россиянинг Европа ҳудуди орқали кириб келган жуда совуқ ҳаво массалари таъсири остида бўлди, деб ёзмоқда «Ўзгидромет».

Кечаси ва эрталаб ҳаво ҳарорати 10-12 даража совуққача пасайди. Қорақалпоғистонда 20-22 даража совуқ, Устюртда 23-25 даража совуқ бўлди. Кундуз кунлари ҳарорат 4-6 даража совуқдан юқорига кўтарилмади, шимолда ҳарорат 8-10 даража совуқ атрофида бўлди. Бундай ҳарорат меъёрий қийматлардан 12-17 даража паст бўлди.

Қайд этилишича, 26 февралдан бошлаб совуқ ҳаво массалари республика ҳудудидан чиқишни бошлади. Унинг ўрнига Туркманистон ҳудудларидан илиқ ҳаво массалари кириб келмоқда.

«Дам олиш кунлари ҳавонинг илиши давом этади. Якшанба кунига келиб, кечаси 3-5 даража совуққача кучсизланади, кундуз кунлари эса 7-12 даража илиққача кўтарилади. Аммо бу февраль ойининг охиридаги иқлимий меъёрлардан бироз пастроқдир», — дейилади «Ўзгидромет» хабарида.

Республика ҳудудининг кўп қисмида ёғингарчиликсиз об-ҳаво бўлиши кутилмоқда. Фақат Қорақалпоғистон, Хоразм вилояти ва республиканинг тоғли ҳудудларининг баъзи жойларида бироз қор ёғади.

Ўзбекистоннинг тоғли ҳудудларида қор кўчиши хавфи сақланиб туради.