Тошкентнинг «Пахтакор» клуби ҳужумкор ярим ҳимоячи Сардор Рашидов билан шартнома имзолади.
Профессионал футбол Лигаси (ПФЛ) матбуот хизматининг маълум қилишича, «Пахтакор» клуби Рашидов ва «Насаф» ярим ҳимоячиси Шароф Муҳитдинов билан 2021 йилнинг декабрига қадар шартнома имзолаган.
Ҳар икки футболчи «шерлар» сафига эркин агент мақомида келиб қўшилган.
Аввалроқ Рашидов «Пахтакор» машғулотларида пайдо бўлган, бироқ клуб матбуот хизмати футболчи билан музокаралар давом этаётгани ҳақида маълум қилганди.
Рашидовнинг сўнгги жамоаси «Қатар СК» клуби бўлиб, Сардор 2019 йилда «Насионал»дан қатарликлар сафига ўтганди. Рашидов 2020 йилнинг сентябрида «Қатар СК» билан шартномасини узайтиргани маълум қилинганди, бироқ футболчи ўшандан кейин жамоа ўйинларида қатнашмади. У 2021 йилнинг 1 январидан эркин агент мақомида эди. Рашидов фаолияти давомида «Бунёдкор» (2010—2015), «Ал-Жаиш» (Қатар, 2015—2017), «Ал-Жазира» (БАА, 2017-2018) ва «Локомотив» (2018) клубларида тўп сурган.
Муҳитдинов 2015 йилдан буён «Насаф»да фаолият юритиб келаётганди. У Суперлига 2020 йилги мавсумида 26 ўйин ўтказиб, бешта гол ва учта голли узатма муаллифига айланди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)