Янги Зеландияда адашиб қолган улоқча 200 метрли қувур ичига кириб қолди. Унинг эгалари сув оқимидан келаётган маъраш орқали улоқчани топишга муваффақ бўлган, деб ёзади Meduza.
Ҳайвон эгалари панжара орқали таёқ тиқиб, улоқчани чиқиш туйнуги томон йўналтирмоқчи бўлган, бироқ ҳаракатларнинг барчаси бекор кетган — у жойидан қимирламаган. Шунда улар кўнгилли ўт ўчириш бўлимининг волонтёрларини ёрдамга чақирган. Улар сув оқими бўйлаб шланг юборган ва ҳайвонни сув сепиш орқали чиқариб олишга уринган. Бироқ бу ҳам ёрдам бермаган.
Ўт ўчирувчилар қувур олдига улоқчанинг онасини олиб келишга қарор қилган. Улар онасининг овозини эшитган улоқча югуриб чиқади деган умидда бўлган. Ўт ўчирувчилар яна бир бор адашган: она эчкини ўт-ўлан ва бошқа егуликлар қизиқтиргани сабаб у улоқчани чақирмаган.
Қутқарувчиларда бошқа ҳеч қандай ғоя қолмаган — улар улоқчанинг ўзи югуриб чиқишини кутишдан бошқа имкон йўқлигини айтган. Бунга эса тўрт кун вақт керак бўлган. Бу вақт давомида ҳайвон панжара ортидан ташланган озуқа ёрдамида боқилган.
Охир-оқибат улоқча ташқарига чиққан ва уни яхши кўрувчи хўжайинлари билан топишган.
Мавзуга доир: Австралия полицияси етим улоқчани ишга олди
Изоҳ (0)