Yangi Zelandiyada adashib qolgan uloqcha 200 metrli quvur ichiga kirib qoldi. Uning egalari suv oqimidan kelayotgan ma’rash orqali uloqchani topishga muvaffaq bo‘lgan, deb yozadi Meduza.
Hayvon egalari panjara orqali tayoq tiqib, uloqchani chiqish tuynugi tomon yo‘naltirmoqchi bo‘lgan, biroq harakatlarning barchasi bekor ketgan — u joyidan qimirlamagan. Shunda ular ko‘ngilli o‘t o‘chirish bo‘limining volontyorlarini yordamga chaqirgan. Ular suv oqimi bo‘ylab shlang yuborgan va hayvonni suv sepish orqali chiqarib olishga uringan. Biroq bu ham yordam bermagan.
O‘t o‘chiruvchilar quvur oldiga uloqchaning onasini olib kelishga qaror qilgan. Ular onasining ovozini eshitgan uloqcha yugurib chiqadi degan umidda bo‘lgan. O‘t o‘chiruvchilar yana bir bor adashgan: ona echkini o‘t-o‘lan va boshqa yeguliklar qiziqtirgani sabab u uloqchani chaqirmagan.
Qutqaruvchilarda boshqa hech qanday g‘oya qolmagan — ular uloqchaning o‘zi yugurib chiqishini kutishdan boshqa imkon yo‘qligini aytgan. Bunga esa to‘rt kun vaqt kerak bo‘lgan. Bu vaqt davomida hayvon panjara ortidan tashlangan ozuqa yordamida boqilgan.
Oxir-oqibat uloqcha tashqariga chiqqan va uni yaxshi ko‘ruvchi xo‘jayinlari bilan topishgan.
Mavzuga doir: Avstraliya politsiyasi yetim uloqchani ishga oldi
Izoh (0)