Жанубий Кореянинг Guru IoT компанияси уй эгаси бўлмаган вақтда уй ҳайвонларига шерик бўлиб ўтирадиган Peddy роботини тақдим этди, деб хабар беради IXBT.
Робот уй ҳайвонини овқатлантириши, унинг зерикишига йўл қўймаслиги ва ўз хўжайини билан видеоалоқани таъминлаши мумкин. Ҳароратни, намлик ва шовқинни ўлчашга мўлжалланган датчиклар роботнинг вазиятни кутилмаганда ўзгаришига тайёр бўлишини таъминлаб, содир бўлаётган воқеалар тасвирини ўз эгасининг смартфонига юбориб туради.
«Peddy ёрдамида уй эгалари ўз жонзотлари билан уйдан узоқда бўлганида ҳам видеоалоқа орқали мулоқот қилиши мумкин. Робот ҳиссий таъсир ўтказиш функцияси билан жиҳозлангани сабаб у коронавирус оқибатида сайрларнинг камайиб кетганида депрессияга тушган уй ҳайвонларига ёрдам бера олади», — дейди Guru IoT вакили.
Роботнинг ўлчами 302х364х260 миллиметрни, оғирлиги 3,8 килограммни ташкил этади. У GPS қурилма, турли датчиклар, Bluetooth 4.0 интерфейси ва 4G LTE функцияли мобил алоқа модеми билан жиҳозланган. Робот сиғими 10 минг мА/соатга тенг аккумулятор ёрдамида қувваталанади ва сониясига 10 сантиметр тезликда ҳаракатланади. Унинг нархи 315 доллар атрофида.
Аввалроқ Германияда худди инсонлар каби қучоқлашга қодир робот яратилгани тўғрисида хабар берилганди.
Изоҳ (0)