Spotify мусиқий стриминг сервиси яна 85 та янги бозорга, жумладан, Ўзбекистонга киришини эълон қилди. Бу ҳақда компания баёнотига таяниб, Spot хабар берди. Шунингдек, сервис 36 та янги тилни қўшмоқда. Сервис яқин бир неча кун ичида ишга тушиши кутилмоқда.
«Ҳозирда Spotify’дан тахминан дунёнинг ярим мамлакати фойдаланмоқда, бироқ ҳамон дастурдан фойдалана олмаётган миллионлаб яратувчилар ва миллиардлаб тингловчилар мавжуд», — дейди компания бош директори Дэниэл Эк.
Янги давлатларда ҳам пулли, ҳам бепул режаларга обуна бўлиш мумкин, айрим бозорларда эса Spotify индивидуал, оилавий, икки кишилик ва талабалар тарифларига оид вариантларни тақдим этади.
Ўзбекистонда ва бошқа давлатларда Spotify тўлиқ глобал каталогини тақдим этади. Шунингдек, компания каталогини кенгайтириш йўлида маҳаллий муаллифлик ҳуқуқи эгалари ва шериклар билан ишлаш ниятида, бу маҳаллий композициялар ва муаллифларни янада кўпроқ қўшишга сабаб бўлади.
Аввалроқ Spotify Ўзбекистонда солиқ тўловчилар ҳисобига тургани маълум бўлганди. Швециянинг мусиқий сервисидан ҳозирда дунёнинг 120 мамлакати фойдалана олади, унинг каталогидан 50 миллиондан ортиқ мусиқа ва 4 миллиард плейлист ўрин олган.
Изоҳ (0)