Фарғонада кўп қаватли уйлар орасидаги қурилишлар нега тўхтатилганига изоҳ берилди
Фарғона шаҳрида кўп қаватли турар жойлар ўртасида барча қурилишлар тўхтатилиб, пойдевор учун қазилган котлованлар кўмилиши ҳақида хабар берилган эди. 20 февраль куни вилоят ҳокимлиги матбуот хизмати томонидан ташкил этилган брифингда кўп қаватли уйлар орасида режалаштирилаётган уйларнинг қурилишини тўхтатиш ва унга қонуний баҳо беришга бир қатор омиллар сабаб бўлгани маълум қилинди.
ЎзАнинг ёзишича, брифингда вилоят ҳокими ўринбосари Дилшод Ҳожиаҳмедов, Фарғона шаҳар ҳокими Мирзоҳид Убайдуллаев ва шаҳар прокурори Дилмурод Қобулов бу борадаги ишлар ҳақида ахборот берди.
Фарғона шаҳар ҳокими Мирзоҳид Убайдуллаевнинг сўзларига кўра, шаҳарсозлик қоидаларига кўра, кўп қаватли уйлар орасида болалар учун майдончалар ва ўсмирларни спорт билан шуғулланишларига майдонлар, аҳолини дам олиши ва сайр қилиши учун кўкаламзорлаштирилган ҳудудлар ташкил этилган бўлиб, янги қурилишлар натижасида айнан мана шу иншоотлар бузиб юборилган.
Янги қурилишлар кўп қаватли уйларга хизмат кўрсатувчи муҳандислик-коммуникация тармоқларига жиддий зарар етказмоқда. Шу сабабли айни кунларда қурилишлар тўхталиб, бузиб юборилган болалар майдончалари қайта тикланмоқда, соғломлаштириш йўлаклари барпо этиляпти, ҳудудларда ободонлаштириш ва кўкаламзорлаштириш ишлари бажариляпти. Шунингдек, автотураргоҳлар, сайр қилиш учун хиёбонлар ташкил қилинмоқда.
«Албатта, мазкур ишларни амалга оширишда тадбиркорларнинг қонуний ҳуқуқ ва манфаатларига зарар етказмаслик чоралари кўрилган. Қарорлар қабул қилинган, лекин қурилиши бошланмаган ҳамда эндигина қурилишга киришган тадбиркорларга бошқа ҳудудлардан ер майдонлари таклиф этилмоқда», — деган Мирзоҳид Убайдуллаев.
Хабарда айтилишича, Фарғона шаҳрининг бош режаси ва урбанизация дастурига кўра, Нурафшон кўчасидаги Мустақиллик шаҳарчаси ва Аэропорт кўчасида бунёд этилаётган мавзеда янги турар жойлар барпо этилмоқда. Шунингдек, Фарғона туманидан шаҳарга қўшилаётган 300 гектар ер майдонига Туркия ва Жанубий Кореянинг лойиҳа институтлари билан ҳамкорликда йўлдош шаҳарчанинг бош режаси ишлаб чиқиляпти. Тадбиркорлар бу ерда қурилиш ишларини олиб бориши мумкин.
Шаҳар прокуратураси томонидан ҳозирга қадар 20 дан ортиқ маҳаллаларда қурилиш ишлари ўрганиб чиқилган.
Эслатиб ўтамиз, Хайрулло Бозоров Фарғона шаҳридаги «Дўстлик» ҳамда «Гулзор» маҳаллаларидаги аҳоли яшаш шароитларини ўрганиш жараёнида ҳудудда кўп қаватли турар жойлар орасида яшил майдонлар ҳудудидаги дарахтлар кесилгани, болалар ва спорт майдончалари бузилгани ва ўрнига янги бинолар қурилиши бошланганига гувоҳ бўлганди.
Вилоят ҳокими биргаликда ўрганиш олиб бораётган шаҳар ҳокими ва прокурорига 13 февралдан бошлаб Фарғона шаҳрида кўп қаватли турар жойлар ўртасида олиб борилаётган барча қурилишларни тўхтатиш ҳамда бундай қурилишларга рухсат бериш билан боғлиқ қарорларни бекор қилиш юзасидан топшириқ берганди.
Шунингдек, Шавкат Мирзиёевнинг Фарғона вилоятига ташрифи чоғида Фарғона шаҳар Шодиёна маҳалласига кутилмаганда бориб, бу ерда аҳоли билан учрашуви ва мавжуд ҳолатнинг ўрганганлиги ҳудудларда кўплаб муаммолар борлигини кўрсатган. Президентнинг Фарғона вилоятига ташрифи давомида Қува, Ёзёвон ва Ўзбекистон туманлари ҳокимлари, шунингдек, Фарғона шаҳри «тўртлиги» вазифасидан озод қилинганди.
