Жаҳон соғлиқни сақлаш ташкилоти (ЖССТ) томонидан 2021 йилда COVID-19 коронавирус пандемиясига қарши кураш доирасида ишлаб чиқиладиган стратегик режани амалга ошириш учун 1,96 миллиард АҚШ доллари миқдорида молиялаштириш ишлари бажарилиши талаб этилди. Бу ҳақда Женевада ўтган брифингда ЖССТ раҳбари Тедрос Адан Гебрейесус маълум қилган, деб ёзмоқда «ТАСС».
Унинг сўзларига кўра, янги режада жами олтита асосий вазифа ижросини таъминлаш лозим. Хусусан, касалланишлар сони ва ўлимларни камайтириш, аҳолининг заиф қатламини вирусдан ҳимоялаш ва янги қурилмаларга эътибор қаратиш, яъни вакциналар, диагностика ва даволаш воситалари орқали курашни янада кучайтиришга эътибор қаратилади.
«Мазкур вазифаларни амалга ошириш учун, тахминан, 1,96 миллиард доллар миқдорида молиялаштириш манбаларини жалб қилиш керак, бунда 1,2 миллиард ЖССТнинг ACT — Accelerator (коронавирусга қарши вакциналарни олиш ва тарқатиш лойиҳаси) дастурига сарфланади», — деган Гебрейесус.
Шунингдек, ЖССТ бош директори 643 миллион доллар сиёсий ёхуд ҳарбий низолар ҳукмронлик қилаётган ҳудудларда яшовчи ижтимоий ёрдамга муҳтож одамлар учун йўналтирилиши ҳақида қўшимча маълумот бериб ўтган.
ЖССТ раҳбари режани тўлиқ молиялаштириш дунё миқёсидаги тикланиш ишлари учун инвестиция бўлишига урғу берган. Шунингдек, у мазкур йўналишдаги ишлар орқали соғлиқни сақлаш тизимида келажакда пайдо бўлиши мумкин бўлган фавқулодда вазиятларга тайёргарлик кўрилиши, уларни олдиндан бартараф қилиш чораларини амалга ошириш мумкинлигини эслатиб ўтган.
Гебрейесус дунё борган сари коронавирусга қарши вакцина барча мамлакатлар учун тенг тарзда тақсимланадиган вақтга яқинлашиб бораётганини хабар қилган.
Аввал АҚШ разведка идораларининг ЖССТ экспертлари билдирган коронавирус табиий шароитда юзага келгани ҳақидаги тахминига ишонмаётгани ҳақида хабар берилган эди.
Изоҳ (0)