Бугун,

  • USD 11014.01
  • RUB 191.8
  • EUR 10674.78

Ўзбекистон Бош прокуратураси ҳузуридаги Департамент тадбиркорларнинг почта манзилларини бузиб кириш ҳамда уларнинг маблағларини ўзлаштириш билан боғлиқ фирибгарлик ортиб бораётганидан огоҳлантирди.

Фото: «Дарё»

Фото: «Дарё»

Хусусан, икки ўзаро ҳамкор инсофли компания ўртасидаги савдо алоқалари доирасида жиноятчилар товар етказиб берувчининг электрон почтасини бузиб кириб, ўзаро ёзишмаларни қўлга киритган ҳолда сохта ҳужжатлар орқали етказиладиган товар учун тўловни амалга ошириш тўғрисида харидор ёки молиявий ташкилотнинг манзилига хат юборганлиги ҳолатлари аниқланган.

Ушбу ҳолатларда етказиб берувчи компания бир мамлакатда, сохта маълумотлар йўналтирилган компания реквизитлари бошқа мамлакатга тегишли бўлган.

Ўғирланган маблағларнинг кейинги ҳаракатлари ўрганилганда, қўлга киритилган пуллар иккинчи мамлакатда вақтинча яшовчи шахс томонидан нақдлаштирилган ва учинчи мамлакатга олиб чиқиб кетилган.

Шу сабабли Бош прокуратура чет эл компаниялари ёки ишлаб чиқарувчилари билан ўзаро савдо ҳамкорлигини амалга оширишда ҳушёр бўлишга, очиқ манбалар, улар тўғрисида ёзилган шарҳлар орқали тадбиркорларнинг ҳалоллигини ўрганишга ҳамда номаълум ва шубҳали манзиллардан келган хабарлар ва ҳаволаларни (ссилка) очмасликка чақирди.

«Ахборот хавфсизлигини таъминлашда лицензияланган дастурий таъминот воситаларидан фойдаланиш, шахсий почта, мобил ҳамда компьютер қурилмаларига киришда икки факторли аутентификациядан фойдаланиш, шунингдек, муқобил алоқа каналлари орқали хорижий шериклар билан тузилган шартномаларнинг ишончлилигини қайта текшириш орқали жиноятчилар томонидан маблағларингизни ўғирлаш хавфини сезиларли даражада камайтирасиз», — дейилади хабарда.

Изоҳ
Асосий янгиликлар