Фарғонада Matiz автомашинаси терак дарахтига урилиши оқибатида 1 ёшли қиз вафот этди, дея хабар бермоқда ИИВ.
Маълум қилинишича, 17 февраль, чоршанба куни фуқаро М.Д. Matiz русумли автомашинасини Аввал—Водил йўлининг 15-километрида бошқарувни йўқотиб, йўл четидаги терак дарахтига урилган.
Оқибатда автомашинада бўлган ҳайдовчининг 1 ёшли қизи тан жароҳати олиб, ҳодиса жойида вафот этган.
Бундан ташқари, автомашина ҳайдовчиси М.Д., йўловчилар, ҳайдовчининг турмуш ўртоғи М.М. ва қайнсинглиси А.З. тан жароҳати олиб, шифохонага ётқизилган.
Мазкур ҳолат юзасидан Фарғона тумани ИИБ ҳузуридаги тергов бўлими томонидан Жиноят кодексининг 266-моддаси 2-қисми (одам ўлимига сабаб бўлган транспорт бошқариш қоидаларини бузиш) билан жиноят иши қўзғатилиб, тергов ҳаракатлари давом этмоқда.
Бундан аввал Навоийда маст ҳайдовчи бошқарувидаги Lacetti ЙПХ пости олдида аварияга учраб, ёниб кетгани, Фарғонада «Жигули»нинг каналга тушиб кетиши оқибатида 3 киши ҳалок бўлгани ҳамда Хоразмда ака синглисини ярим тунда манзилга олиб келиб қўйган Damas ҳайдовчиси билан жанжаллашиб, уни ўлдириб қўйгани ҳақида хабар берилганди.
Изоҳ (0)