Навоий вилояти Кармана туманида Cobalt ва велосипед иштирокида йўл-транспорт ҳодисаси содир бўлди, дея хабар қилмоқда ИИВ.
Маълум қилинишича, 15 февраль, душанба куни соат 21:30 ларда туман ИИБ ЙҲХБ навбатчилик қисмига Кармана ҳудудидан ўтган М-37 автомобиль йўлида велосипедчи иштирокида йўл-транспорт ҳодисаси содир бўлгани ҳақида хабар келиб тушган.
Қайд этилишича, Cobalt русумли автомобиль Бухоро—Навоий йўналишида ҳаракатланиб кетаётганда велосипед машинанинг қарама-қарши томонидан чиқиши оқибатида ЙТҲ содир этилади. Оқибатда велосипед ҳайдовчиси воқеа жойида вафот этади.
Мазкур иш юзасидан ҳозирда Кармана тумани ИИБ томонидан тергов ҳаракатлари олиб борилмоқда.
Мазкур ЙТҲ келиб чиқиши сабаблари ўрганилганда М-37 йўлининг 173—174-километри аҳоли яшаш жойидан ўтган бўлишига қарамай тунги ёритиш чироқлари билан ёритилмагани, шунингдек, велосипед ёруғлик қайтарувчи жиҳозлар билан жиҳозланмаганлиги аниқланган.
Бундан аввал Ўзбекистонда 2020 йилда йўл-транспорт ҳодисалари оқибатида жами 1962 киши ҳалок бўлгани, Қашқадарёда Lacetti 50 метр пастликка қулаши оқибатида уч нафар фуқаро воқеа жойида вафот этгани ҳамда Қашқадарёда «участковой» бошқарувидаги Nexia пиёдалар йўлакчасидан ўтаётган 7 ёшли мактаб ўқувчисини уриб юборгани ҳақида хабар берилганди.
Изоҳ (0)