Британияда 2030 йилга мўлжалланган самолёт каби бошқарилувчи электрогиперкар концепти тақдим этилди (фото)

Британиядаги Lotus автомобиль ишлаб чиқарувчи компанияси 2030 йилги бардошлилик пойгалари учун янги Lotus E-R9 номли электрогиперкарни тақдим этди, деб хабар беради CARakoom.

Лойиҳа Lotus компаниясининг бош аэродинамиги Ричард Хилл, шунингдек, Lotus Evija электросуперкарининг бош муҳандиси Луис Керр томонидан яратилган.

Lotus E-R9 учбурчак корпуснинг бир қисмига айланган ҳарбий қирувчи самолётдаги каби қуббага эга бўлган. Суперкар кўплаб аэродинамик ечимлар билан ажралиб туради, жумладан, Lotus «трансформацияланувчи» корпус панели ва вертикал жойлашган рул бошқарувига эга.

«Ўзгарувчан» кузов панеллари ҳаво оқимига нисбатан ўз шакли ва ҳолатини ўзгартира олади. Бу тугмани босиш орқали ёки датчиклардан маълумотларни автоматик узатиш орқали амалга оширилади. Гап шундаки, ушбу панеллар тўғри йўлларда ва бурилишларда минимал қаршиликни таъминлай олади.

Автомобиль ишлаб чиқарувчининг сўзларига кўра, Lotus E-R9’нинг орқа қисмидаги вертикал руллар бурилишларда орқа ғилдиракларнинг йўл билан алоқасини ўзгартирмаган ҳолда бошқарувни созлаш имконини беради. «Қаршимизда нафақат оддий усул, балки самолёт каби бошқариладиган пойга автомобили турибди», — дейилади хабарда.

Автомобиль номидаги R ҳарфи Endurance Racer маъносини берса, 9 рақами компаниянинг пойга тарихига ҳурмат рамзи ҳисобланади, хусусан, компаниянинг биринчи пойга автомобили бўлган Lotus Mark IX 1955 йили 24 соатли Ле-Ман пойгаларида иштирок этган.

Lotus E-R9 электр энергиясида ишлайдиган двигатель билан жиҳозланган бўлиб, машинадаги ҳар бир ғилдирак мустақил равишда ҳаракатга келади ва бу айланувчи момент векторини ўзгартириши мумкин.

«Батареялардаги энергиянинг зичлиги ва тақдим этиладиган қувват йилдан йилга ортиб бормоқда. 2030 йилга бориб иккала даврнинг энг яхши жиҳатларини ўзида бирлаштирган кимёвий таркиби турли элементлардан иборат бўлган батареяларга эга бўламиз, шунингдек, пит-стоп вақтида батареяларни тезда алмаштириш имконияти юзага келади», — дейди Луис Керр.

Аввалроқ АҚШда самолётга айлана оладиган автомобиль тақдимоти бўлиб ўтгани тўғрисида хабар берилганди.