General Motors концерни назорати остида бўлган GMC маркаси янги Hummer’нинг имкониятлари намойиш этилган навбатдаги ролик билан бўлишди. Видеода GMC Hummer EV электропикапининг прототипи қор уюмида «кулча ясаганини» кўриш мумкин, деб хабар беради Motor.
GMC электр энергиясида ҳаракатланувчи Hummer’ини 2020 йилнинг октябрида намойиш этган бўлиб, ҳозирга қадар тўлақонли «товар» версиясини кўрсатмай келаётган эди. Компания электрокарларнинг тўлақонли серияли йиғиш 2021 йилнинг охирларига бориб йўлга қўйилишини ваъда қилган, аммо айни вақтда ҳам модель устидаги ишлар ниҳоясига етгани йўқ.
GMC компанияси Hummer’га бўлган қизиқишни ушлаб туриш мақсадида йўлтанламаснинг турли имкониятлари намойиш этилган қисқа роликлар билан бўлишишни давом этмоқда. Аввалроқ эълон қилинган видеода Crab Моde ёки «қисқичбақа режими» намойиш этилганди.
Facebook’даги видео остига қолдирилган изоҳларда фойдаланувчилар дрифтни юқори баҳолаган, бироқ GMC’ни тўлиқ «яшил» двигателдан фойдаланишини танқид қилган.
https://www.facebook.com/gmc/videos/1069445696867979
«Қувватлантиришда керак бўладиган генераторни олиб юриш учун кузовда етарлича жой борлиги яхши», — деб ёзади фойдаланувчилардан бири.
Бошқалар эса йўлтанламаснинг ойналари кичиклигига ва унинг ичидан атрофни кузатиш ноқулайлигига эътибор қаратган, бироқ аксарият фойдаланувчилар асосий камчилик сифатида Hummer EV’нинг нархини келтириб ўтган. Edition 1 версиясининг нархи 113 минг доллардан бошланади. Таққослаш учун, марканинг рақиби ҳисобланувчи Tesla Cybertruck’нинг минимал нархи 39,99 минг долларни ташкил этади.
Hummer EV Edition 1 1014 от кучига эга уч моторли двигатель ёрдамида ҳаракатга келади. Йўлтанламас соатига 100 километр тезликка уч сонияда эришади, Ultium батареяларининг бир марта қувватланиши орқали 560 километрдан ортиқ йўл боса олади.
Изоҳ (0)