Ҳинд киносаноатидаги энг кўп бирга суратга тушган актёр ва актрисалар ҳақида маълумот бериб ўтамиз.

Дхармендра ва Ҳема Малини

Фото: Pinkvilla

Гўзаллиги ва маҳорати билан эътирофга сазовор бўлган актриса ва Болливудда ўз ўрнига эга бўлган актёр биргаликда 40 дан ортиқ фильмларда суратга тушган. Улар орасидаги энг эсда қоладиганларидан бири 1975 йилда суратга олинган «Қасос ва қонун» фильми саналади. Улар гавдалантирган жуфтлик нафақат Ҳиндистон, балки бошқа мамлакатларда ҳам машҳурликка эришган. Улар «Гўзал ва қайсар» фильмининг суратга олиш жараёнида бир-бирини севиб қолган, аммо Дхармендранинг оиласи бор экани сабаб жуфтлик муносабатлари кўплаб муҳокамаларга сабаб бўлган. Шунга қарамай, машҳурлар кейинчалик турли қийинчиликларни енгиб ўтиб турмуш қуришга муваффақ бўлган. «Султоннинг қизи», «Алибобо ва қирқ қароқчи», «Озудаги қиз», шунингдек, «Зита ва Гита» сингари фильмлар улар иштирокидаги энг омадли лойиҳалардан саналади.

Риши Капур ва Нита Сингх

Фото: Pinkvilla

Болливуднинг энг машҳур ва чиройли жуфтлиги 19 та лойиҳада иштирок этишга улгурган. «Икки карра икки — тўрт», «Тақдиринг ўз қўлингда», «Амар, Акбар, Антони» фильмлари шулар жумласидан.

Раж Капур ва Наргис

Фото: Pinkvilla

Мазкур жуфтликнинг ижроси томошабинларни ҳеч қачон бефарқ қолдирмаган. 8 йил давомида Раж Капур ва Наргис биргаликда 16 та фильмда суратга тушишга муваффақ бўлган. Актёр ва актрисанинг ролини ишонарли ижро қилиш сири улар ўртасида севги борлиги билан боғлиқ бўлган. Жуфтлик ҳатто оддий саҳналарни ҳам классикага айлантира олган. «Жаноб 420», «Қалб», «Ёмғир мавсуми» сингари фильмлар улар ижросидаги энг машҳур лойиҳалардан саналади.

Амитабх Баччан ва Жая Бҳадури

Фото: Pinkvilla

16 та фильмда бирга суратга тушган жуфтлик муносабатлари уларнинг шахсий ҳаётига ҳам таъсир қилмай қолмаган. Мухлислар учун севимли бўлган Амитабх ва Жая 1973 йилда турмуш қурган. «Гоҳи шодлик, гоҳи ғам», «Қасос ва қонун», «Банси ва Биржу» машҳурлар иштирокидаги энг сара фильмлар саналади.

Анил Капур ва Шридеви

Фото: Pinkvilla

Анил Капур ва Шридеви жами 16 та лойиҳада иштирок этишга улгурган. Актриса Анилнинг акасига турмушга чиққан. Анил ҳамда Шридеви иштирокидаги «Ўзликни йўқотиш», «Қадрдон оғайни», «Жаноб Ҳиндистон» ва бошқа лойиҳалар мухлислар қалбидан жой олган.