Хунук қаҳрамонлар стилистлар ёрдамида ҳақиқий маликаларга айлангани акс эттирилган фильмлар (фото)
Сериал ва фильмлардаги оддий котиба, аълочи ўқувчи ёки жосус қиз образининг ўзгариши мухлислар учун ҳамиша қизиқ. Сюжет давомида кўзойнакларнинг линзага алмаштирилиши, соч турмаги ўзгартирилиши томошабинларнинг экран қаршисига михланишига сабаб бўлади. Эътиборингизга машҳур актрисалар томонидан ижро қилинган ва уларнинг кўриниши аввалгисидан фарқ қилиши учун катта жамоа ишлашига тўғри келган фильм қаҳрамонлари суратини тақим қиламиз.
«Собиқ севгилим» (2006)
Сюжетга кўра, Ума Турман ижросидаги қаҳрамон фильмда икки хил образда намоён бўлади. Оддий ва ёқимтой аёл Женни Жонсон ролини ижро қилганида қора парик, кўзойнак тақади. Аммо Турман суперқаҳрамонга айланиши билан ҳаммаси ўзгаради.
«Prada кўтарган иблис » (2006)
Мода олами билан боғлиқ соҳада ишлагани сабаб Энди Сакс гардеробидаги либосларни тубдан янгилайди, озади (Энн Хетеуэй ушбу рол учун деярли 4,5 кило семиришига тўғри келган, кейин эса озган). Костюмлар бўйича рассом Патрисия Филд кўримсиз Эндини ўзгартириш учун анча тер тўкишига тўғри келган. Филд ва Энн бош қаҳрамон Энди Сакс Chanel костюмини кийиши керак эканлигини тушуниб етган. Бренд ҳам бундай ҳамкорликка бажонидил розилик берган.
«Муҳаббат шароби» (1992)
Сандра Буллок ушбу фильмда кўримсиз лаборант қиз образини гавдалантиришдан чўчимаган. Юлдузнинг мазкур ролдаги ташқи кўриниши учун костюм рассоми ва пардозчиларнинг қаттиқ ишлашига тўғри келган. Қаҳрамон қиз дидсиз кийим ва катта кўзойнак тақади, сочлари ҳам шунга яраша кўринишда бўлади. Бундан ташқари, Сандранинг ёқимли кулгисини яшириш учун тиш протезидан ҳам фойдаланилган.
«Оқсоч» (2011)
Скитер ёқтирган йигитида яхши таассурот қолдириш учун ҳамиша жингалак сочларини текислаб юради. Аммо фильм сўнгида ўзини борича қабул қилишга ўрганади ва табиий гўзаллигига урғу беради.
«Юнонча тўй» (2002)
Тула исмли қаҳрамоннинг отаси қизини турмушга беришни истайди. Аммо қиз бундан кўпроқ нарсага эришишни хоҳлайди ва кунлардан бир кун ҳаётини ўз назоратига олиши кераклигини тушуниб етади. Янги иш топади, ўзлигини қидира бошлайди ва ташқи кўринишига ҳам ўзгартириш киритади.
«Гўзаллар» (1998)
Француз актрисаси Жюдит Годреш мазкур фильмда сипо олима қиз ролини ижро қилади. Унинг ҳаёти Алекс исмли гўзал қизни учратганидан кейин ўзгариб кетади.
«Бриолин» (1978)
Фильмда Сенди исмли қиз ташқи кўриниши ва кийиниш услубини буткул ўзгартиришга қарор қилади. Пушти кўйлакларини қора чарм шимга алмаштиради ва шунга яраша кўринишга эга бўлади.
«Менинг гўзал хонимим» (1964)
Мазкур фильмда Одри ижросидаги гулчи қизни кибор хонимга айлантириш учун пардозчилар жамоаси ва актрисанинг ўзи ҳам яхшигина ишлашига тўғри келган.
«Бетменнинг қайтиши» (1992)
Фильм сюжетига кўра, Селина Кайл исмли котиба лабини қирмизи рангга бўяйдиган ва соч турмаги ўзига ярашган аёлга айланади.
«Ишбилармон аёл» (1988)
Ақлли ва юқори марраларни кўзлайдиган Тесс котиба бўлиб ишлайди ва раҳбар лавозимини эгаллашни орзу қилади. Аммо бундай позицияда ўзига хос кўриниш кераклигини тушуниб етган қаҳрамон имижини ўзгартиришга қарор қилади.
«Эсанкираш» (1958)
Алфред Хичкокнинг триллерида Ким Новак Жуди исмли қаҳрамон қиз ролини ижро қилади. Унда ёрқин макияж қилиб юрадиган, олифта қиз бора-бора кийиниш услуби ва пардозини ўзгартиради.
Мавзуга доир:
