Машҳур сериалларда бир роль учун курашган турк актёрлари (фото)

Мароқ билан томоша қилинган турк сериалларининг асосий актёрлари ўрнига бошқаларни тасаввур қилиш қийин. Лекин шуни ёдда тутиш керакки, сериал суратга олишнинг биринчи кунидан, шунингдек, кастинг, ғоя, сценарий ва бошқа ташкилий ишлардан бошланади. Туркияда маълум бир актёр учун сериал суратга олиш жуда кам учрайдиган ҳолат. Одатда бош қаҳрамон ролларига бир нечта номзодлар кўриб чиқилади. Агар сценарий кутилмаган воқеаларга бой бўлса, энг таниқли турк актёрларининг иштирок этиши табиий.

«Рамо»: Хатиже Шендил ва Эсра Билгич

2019 йилда журналистлар «Тақдирга қарши муҳаббат» телесериали юлдузи Хатиже Шендил билан суҳбатлашди. Ўша вақтда актриса ҳали ҳам туғруқ таътилида эди. У тез орада экранларга қайтишини режалаштираётганини ҳам айтиб ўтган. Шунингдек, Мурат Йилдирим билан биргаликда роль ижро этишини ҳам. 2020 йилда Хатиже истаганидек «Рамо» сериали эфирга узатилди. Аммо сериал учун продюсерлар ёшроқ актриса – Эсра Билгични танлади.

«Шараф сўзи»: Толгахан Сайишман ва Жан Яман

Сўнгги дақиқагача кўпчилик «Шараф сўзи» сериалида бош қаҳрамонни Жан Яман ижро этади, деб ўйлар эди. Аммо телевизион лойиҳа биринчи марта эълон қилинганда томошабинлар яна бир машҳур актёр – Толгахан Сайишманни кўрди. Балки Жан Яман сериалда иштирок этмагани учун ҳам хурсанд бўлгандир, чунки лойиҳа давомийлиги узоққа бормаган. ОАВ эса сериални «Йилнинг энг муваффақиятсиз лойиҳаси» деб атаган.

«Муҳташам юз йил»: Ойку Челик ва Марям Узерли

«Муҳташам юз йил» сериалида ҳам кутилмаган чеҳраларни кўришга оз қолган. Масалан, Хуррам роли учун турк актрисаси Ойку Челик номзодлардан бири эди. У аллақачон тарихий драмаларда суратга тушиш тажрибасига эга бўлса-да, кўплаб кастинглардан сўнг омад Марям Узерлига кулиб боқди. Ушбу роль учун актриса сочларини бўяб, бироз семиришига ҳам тўғри келган, ва айнан шу роли билан юлдузга айланган.

«Тирилиш. Усмон»: Мурат Йилдирим ва Бурак Ўзчивит

Яна бир тарихий сериал – «Тирилиш. Усмон» учун Чагатай Улусой, Фуркан Палили ва Мурат Йилдирим бош қаҳрамон ролига кўриб чиқилган. Аммо мазкур сериалда севимли актёр Бурак Ўзчивит роль ижро этди. Продюсерлар танлови тўғри эканлигини сериалнинг нафақат Туркияда, балки дунё бўйлаб муваффақиятга эришганидан ҳам билиш мумкин. Буракнинг эса кундан кунга мухлислари ортиб бормоқда.

«Парчаланган юраклар»: Ўзжан Дениз ва Эркан Петеккая

«Парчаланган юраклар» сериалининг бош қаҳрамони Нургул Яшилчой билан партнёр сифатида роль ижро этган Эркан Петеккаянинг ўрнида Ўзжан Дениз ҳам бўлиши мумкин эди. Аммо ўша вақтда «мелодрамалар қироли» аллақачон бошқа фильмда суратга тушишга рози бўлган. Ажабланарлиси шундаки, сериаллар нафақат бир вақтнинг ўзида намойиш этилди, балки сюжети ҳам ўхшаш.