Фарғонада 2020 йилда судлар томонидан 33 нафар шахс оқлангани маълум қилинди

Фарғонада 2020 йил давомида жиноят ишлари бўйича судлар томонидан 3645 нафар шахсга нисбатан 2755 та иш бўйича ҳукм чиқарилган. Бу ҳақда Фарғона вилояти судида ўтказилган матбуот анжуманида маълум қилинди, деб хабар берди «Дарё» мухбири Азизжон Эрматов.

Вилоятда судлар томонидан ўтган бир йил давомида 26 та иш бўйича 33 нафар шахс оқланган ва реабилитация қилинган. 480 нафар шахс суд залидан озод қилинган, 188 нафари эса суд залидан қамоққа олинган. 882 нафар шахсга озодликдан маҳрум қилиш ва 1025 нафар шахсга ахлоқ тузатиш ишлари жазоси тайинланган, 122 нафар шахсга шартли ҳукм ўқилган.

2019 йилга нисбатан айрим жиноят турлари, хусусан, босқинчилик, ўзлаштириш ёки растрата йўли билан талон-торож қилиш, мансаб сохтакорлиги, транспорт воситасини олиб қочиш ҳамда транспорт воситалари ҳаракати ёки улардан фойдаланиш хавфсизлиги қоидаларини бузиш каби жиноятлар учун судланганлик кўрсаткичлари камайган. Қўшмачилик қилиш ёки фоҳишахона сақлаш, ҳақорат қилиш, талончилик, фирибгарлик, ўғрилик, тақиқланган экинларни етиштириш, гиёҳвандлик воситалари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш каби жиноятлар учун судланганлик ҳолатлари кўпайган.

Ҳисобот даврида ярашув институтининг самарали қўлланилиши натижасида 1495 та жиноят иши тугатилган ва 1569 нафар шахс жиноий жавобгарликдан озод этилган. Шунингдек, 4 нафар шахс озодликдан маҳрум қилиш, 538 нафар шахс озодликни чеклаш, 206 нафар шахс муайян ҳуқуқдан маҳрум қилиш, 1356 нафар шахс ахлоқ тузатиш ишлари жазосини ўташдан муддатидан илгари шартли озод қилинган.