Молия вазирлиги ҳузуридаги бюджетдан ташқари Пенсия жамғармаси Ўзбекистоннинг айрим вилоятларида истиқомат қилувчи аҳолига пенсия маблағлари нима сабабдан кеч етиб бораётгани юзасидан ўрганиш ишларини олиб борди. Хусусан, ўрганишлар давомида Жиззахда бир фуқаронинг пенсияси сайёр касса кассири томонидан ўзлаштирилгани аниқланган. Бу ҳақда жамғарма матбуот хизмати «Дарё»га маълум қилди.
Наманган вилояти Учқўрғон туманида истиқомат қилувчи фуқаро Т.М.нинг 2020 йил 15 ноябрь куни Пенсия жамғармаси ишонч телефонига 2020 йил декабрь ойи учун боқувчисини йўқотганликда бериладиган нафақасини олмаган бўлса-да, дастурда тўланди белгиси қўйилганлиги бўйича мурожаат қилган.
Мурожаат ўрганилганда, фуқаро Т.М.га декабрь ойи учун тайинланган боқувчисини йўқотганлик нафақаси АТ «Халқ банки» Учқўрғон тумани сайёр кассаси кассири томонидан ўрнатилган қонунчиликка зид равишда, яъни ишончномасиз МФЙ ходимига ташлаб кетилгани маълум бўлган.
Шунингдек, Жиззах вилояти Зомин туманида истиқомат қилувчи фуқаро М.А.нинг 2020 йил август ойи учун пенсия ҳамда ун ва қолипли нон харид қилиш бўйича компенсация пули тўловлари тўлаб берилмаганлиги бўйича мурожаати ўрганилиб, фуқаронинг пуллари АТ «Халқ банки» Зомин тумани сайёр кассаси кассири томонидан ўзлаштирилганлиги аниқланган.
Пенсия жамғармасининг аралашуви билан фуқарога 2020 йил 31 декабрь кунида пенсия ҳамда ун ва қолипли нон харид қилиш бўйича компенсация пули тўловлари ўрнатилган тартибда АТ «Халқ банки» сайёр кассаси кассирлари томонидан етказиб берилган.
Пенсионерга пенсия тўлови белгиланган тартибда етказиб берилмаганлиги ҳамда ишончномасиз тўлаш ҳолати юзасидан АТ «Халқ банки» бошқарувига тегишли чора кўриш бўйича хат юборилган.
«Юқоридагиларга асосан жойларда пенсия ва нафақаларни етказишда кеч тўлаб бериш ҳолатлари, етказиб беришда хизмат ҳақи талаб этиш, тўлиқ миқдорда берилмаслик ёки тўловлардан чегириб қолиш ёки бошқа ҳолатлар аниқланса, фуқаролардан Пенсия жамғармасининг 1140 рақамли ишонч телефонига мурожаат қилишларини сўраймиз», — дейилади хабарда.
Эслатиб ўтамиз, Пенсия жамғармасининг январь ойи маълумотларига кўра, Ўзбекистонда пенсия ва нафақа олувчиларнинг умумий сони 3,824 миллион кишини, яъни аҳоли сонидаги улуши 11,2 фоизни ташкил қилмоқда.
Изоҳ (0)