Олий ва ўрта махсус таълим вазири Абдуқодир Тошқулов ўз вазифасига совуққонлик билан ёндашган ректорларни танқид қилди, деб хабар бермоқда вазирлик матбуот хизмати.
Фото: Олий ва ўрта махсус таълим вазирлиги матбуот хизмати
Қайд этилишича, ректорлар, проректорлар ва тизимдаги бошқа масъул раҳбарлар билан биринчи йиғилиши кенгайтирилган таркибда видеоконференция тарзида ўтказилиб, унда олий таълимнинг ҳозирги ҳолати, муаммолар ва тизимни яхшилаш бўйича долзарб вазифалар муҳокама қилинди.
Танқидий руҳда ва атиги бир соат давом этган йиғилишда вазирнинг қисқа фурсатда Қашқадарё, Сурхондарё, Бухоро ва Фарғона вилоятига қилган хизмат сафари давомида ҳудуддаги ОТМлар жамоаси ва талабалар билан бўлган мулоқот, ўқув жараёнлари ва яратилган шароитларни ўрганиш тафсилотларига тўхталиб ўтилди.
Фото: Олий ва ўрта махсус таълим вазирлиги матбуот хизмати
Айниқса, Қўқон давлат педагогика институтида ўқув аудиторияларининг аянчли ҳолати, эски ўқув режа ва дастурлар билан ишлаётган педагоглар, институтнинг моддий имконияти мавжуд бўлса-да, аҳволни ўзгартиришга ҳаракат қилмаётган институт раҳбарияти танқид қилиниб, ўз ишига совуққонлик билан қараган масъуллар фаолиятига ҳуқуқий баҳо бериш бўйича топшириқ берилди.
Йиғилишда ўқув жараёнларига замонавий АКТни жорий этиш, АРМлар электрон тизимидаги муаммолар, ОТМларда ҳанузгача сақланиб қолаётган коррупцион ҳолатлар, жумладан, номдор давлат стипендияларига номзодларни саралашда айрим ОТМ масъуллари томонидан адолатсиз ёндашилгани, хусусан, непотизм ҳолатларига йўл қўйилганлиги юзасидан шу кунларда ижтимоий тармоқларда эътирозлар билдирилаётгани айтилиб, ҳолатни ўрганиш ва ойдинлик киритиш мақсадида ишчи гуруҳ тузилиши бўйича мутасаддиларга топшириқлар берилди.
Эслатиб ўтамиз, Термиз давлат университети ректори лавозимида ишлаб келган Абдуқодир Тошқулов 14 январь куни олий ва ўрта махсус таълим вазири этиб тайинланганди. Шавкат Мирзиёев собиқ олий таълим вазири Иномжон Мажидов (Ўзбекистон Миллий университетига ректор бўлди) тизимда ўзгаришлар қилолмагани учун лавозимидан озод этилганини айтганди.
