Видео: Қўл меҳнати билан ёғоч бўлакларидан ясалган Range Rover Overfinch нусхаси

Вьетнамлик дурадгор уста саноат мебели чиқиндиларини санъат асарига айлантирди. У Range Rover Evoque Overfinch’нинг 1:12 масштабдаги ёғоч моделини қандай ясагани тасвирланган видеони YouTube’даги Woodworking Art каналига жойлаштирди, деб хабар беради Motor.

Видеоролик изоҳида ёзилишича, дурадгор Range Rover Overfinch нусхасини дўстининг буюртмасига кўра ясаган. Хом ашё сифатида кичик модель учун маҳаллий сарв дарахти ёғочидан фойдаланилган, нусха лак билан қопланган. Ўйинчоқ кроссовернинг деярли барча элементлари, шасси деталлари, оптика ва қотиргичларидан ташқари, ёғочдан ишланган.

Анъанага кўра, уста ўз нусхасини яратишда уч ўлчамли мураккаб моделдан фойдаланмай, «кўзи билан чамалаб» ишлаган. Бироқ синчковлик ва мулоҳазали ёндашув академик етишмовчиликни қоплаб кетади — ўйинчоқ жуда сифатли, тартибли ва қиммат бўлиб тайёрланган.

Аввалроқ вьетнамлик уста 1:13 масштабда ёғочдан яратилган ўзининг сўнгги иши — Ford Ranger Raptor моделини сотувга қўйгани тўғрисида хабар берилганди. У пикапни яратишга 35 кун сарфлаган ва уни 2 минг долларга сотишга тайёрлигини билдирган.