Video: Qo‘l mehnati bilan yog‘och bo‘laklaridan yasalgan Range Rover Overfinch nusxasi

Vyetnamlik duradgor usta sanoat mebeli chiqindilarini san’at asariga aylantirdi. U Range Rover Evoque Overfinch’ning 1:12 masshtabdagi yog‘och modelini qanday yasagani tasvirlangan videoni YouTube’dagi Woodworking Art kanaliga joylashtirdi, deb xabar beradi Motor.

Videorolik izohida yozilishicha, duradgor Range Rover Overfinch nusxasini do‘stining buyurtmasiga ko‘ra yasagan. Xomashyo sifatida kichik model uchun mahalliy sarv daraxti yog‘ochidan foydalanilgan, nusxa lak bilan qoplangan. O‘yinchoq krossoverning deyarli barcha elementlari, shassi detallari, optika va qotirgichlaridan tashqari, yog‘ochdan ishlangan.

An’anaga ko‘ra, usta o‘z nusxasini yaratishda uch o‘lchamli murakkab modeldan foydalanmay, “ko‘zi bilan chamalab” ishlagan. Biroq sinchkovlik va mulohazali yondashuv akademik yetishmovchilikni qoplab ketadi — o‘yinchoq juda sifatli, tartibli va qimmat bo‘lib tayyorlangan.

Avvalroq vyetnamlik usta 1:13 masshtabda yog‘ochdan yaratilgan o‘zining so‘nggi ishi — Ford Ranger Raptor modelini sotuvga qo‘ygani to‘g‘risida xabar berilgandi. U pikapni yaratishga 35 kun sarflagan va uni 2 ming dollarga sotishga tayyorligini bildirgan.