Xalq ta’limi vazirligi 2020-yilning 5-iyun kuni Toshkent viloyati Zangiota tumani hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Baxtiyor Mamadaliyev o‘qituvchilarni majburiy obuna va mehnatga jalb qilgani uchun 15 million 610 ming so‘m jarimaga tortilgani haqida xabar bergandi. Baxtiyor Mamadaliyev esa mazkur masala bo‘yicha sudga murojaat qilgan. Bu haqda O‘zA xabar berdi.

Foto: O‘zA

Vazirlik axborotida bu ish xalq ta’limi vaziri Nazorat-huquqiy xizmati hamda Toshkent viloyati Bandlik bosh boshqarmasi Davlat mehnat inspeksiyasi hamkorligida amalga oshirilgani qayd etilgan.

Unga ko‘ra, hokim o‘rinbosari maktab direktorlariga yanvar oyida gazeta va jurnallarga obuna bo‘lish haqida topshiriq bergan, maktab mikrohududidagi mahalla fuqarolar yig‘inida yashovchi kam ta’minlangan aholini xatlovdan o‘tkazishda o‘qituvchilardan yordam so‘ragan. Bundan tashqari, 28-may kuni yoshlar yetakchisi va yana bir nafar xodim bilan birga tumandagi barcha maktab direktorlari va 80 nafardan ortiq o‘qituvchini o‘t yulish va yerni chopiq qilish, yumshatish ko‘rinishidagi majburiy mehnatga jalb qilgan.

O‘zAning xabar berishicha, mazkur xabarlar tarqalgach, hokim o‘rinbosari o‘ziga nisbatan chiqarilgan qarordan norozi bo‘lib, sudga murojaat qilgan. O‘zA bo‘lib o‘tgan voqeani atroflicha o‘rganib chiqish maqsadida hodisa ishtirokchilari bilan bog‘langan.

“Meni ko‘proq internet tarmoqlarida tarqalgan xabarlar tashvishga soldi. Chunki menga taalluqli xabar chiqishi bilan bundan yaqinlarim xavotirga tushib, bu haqda surishtira boshlashdi. Men esa o‘sha daqiqalarda shunchaki aybsiz aybdor edim. Jarima to‘lashdan ko‘ra, aynan mana shu narsa meni sudga murojaat qilishga majbur qildi”, — deya ta’kidlagan Baxtiyor Mamadaliyev.

Agentlikning qayd etishicha, Zangiota tumani ma’muriy sudida bo‘lib o‘tgan sud majlisida Baxtiyor Mamadaliyev huquqbuzarlik faktlarini inkor qilib, o‘ziga qarshi qaror dalillarsiz, shoshma-shosharlik bilan, bir tomonlama qabul qilinganini, hech kimni obuna bo‘lishga va kam ta’minlangan aholini xatlovdan o‘tkazishga majburlamaganini hamda majburiy mehnatga jalb qilmaganini ma’lum qilgan.

Baxtiyor Mamadaliyev O‘zAga Toshkent viloyati hokimi va Zangiota tumani hokimining tegishli farmoyishlari asosida 2020-yil uchun gazeta va jurnallarga obuna tashkil etish bo‘yicha targ‘ibot ishlari bilan shug‘ullanganini ta’kidlagan.

O‘zAning yozishicha, hokim o‘rinbosari kam ta’minlangan aholini xatlovdan o‘tkazish bo‘yicha tuman xalq ta’limi mudiridan amaliy yordam ko‘rsatishni so‘ragan. Baxtiyor Mamadaliyevning ta’kidlashicha, bundan maqsad shu yo‘nalishda ijtimoiy adolat ta’minlanishiga erishish bo‘lgan. “Chunki o‘qituvchilar jamiyatning ziyoli qatlami bo‘lishi bilan birga, vaziyatni aniqlash, haqiqiy muhtoj odamlarning ro‘yxatga kirishida jamoat nazorati o‘rnata oladi. Shunday ishonch bilan o‘qituvchilardan yordam so‘ralgani uchun ham ular bu ishni beminnat amalga oshirgan. Qolaversa, karantin paytida haqiqatan kam ta’minlangan yoki muhtoj shaxslarning e’tibordan chetda qolmasligi davlat siyosati darajasidagi ish bo‘lgan”, — deyiladi xabarda.

Sudda guvoh tariqasida so‘roq qilingan Zangiota tumani Xalq ta’limi bo‘limi mudiri vazifasini bajaruvchi A.Rahmatullayev Zangiota tumani hokimi o‘rinbosari qo‘ng‘iroq qilib, 2020-yil 28-may kuni xodimlarni yig‘ish kerakligini, maktablarni ta’mirlash va obodonlashtirish ishlari haqida gaplashib olish kerakligini aytganini, lekin yig‘ilish bo‘lmaganini ma’lum qilgan.

Xalq ta’limi bo‘limi rahbari obuna ishlari esa ixtiyoriy ravishda amalga oshirilgani, maktab mikrohududida yashovchi kam ta’minlangan aholini xatlovdan o‘tkazish va hisobotlarni hokimiyatga topshirish to‘g‘risida yordam so‘ralgani, buni to‘g‘ri tushungan holda bu masalada yordam berilgani, hech kimni majburiy mehnatga jalb etmaganini bayon qilgan.

Sudda guvoh tariqasida so‘roq qilingan 19-maktab direktori M.Telefova maktab hududini obodonlashtirish ishlariga e’tibor qaratish lozimligi haqida ko‘rsatma bo‘lgani, 28-may kuni shu maqsadda ishga borgani, lekin ishlamasdan qaytib kelgani, ularni hech kim ishlashga majburlamaganini bayon etgan.

Sudda guvoh sifatida qatnashgan 1-maktab direktori B.Ahmedov, 2-maktab direktori X.Jalolova, 3-maktab direktori Sh.Xudoyorov va boshqalar M.Telefovaning ko‘rsatmalarini tasdiqlab, shunga o‘xshash ko‘rsatma berib, majburiy mehnatga jalb qilinmaganliklarini aytgan.

Sud o‘z qarorida Ma’muriy javobgarlik to‘g‘risidagi kodeksning 271-moddasi 1-bandida ma’muriy huquqbuzarlik hodisasi yoki alomati yo‘q bo‘lsa, ma’muriy huquqbuzarlik to‘g‘risidagi ishlarni yuritishni boshlash mumkin emasligi, boshlangan ish esa tugatilishi lozimligi ko‘rsatilganini qayd etgan.

Zangiota tumani ma’muriy sudi sudyasi A.Abdurazzoqov tuman hokimi o‘rinbosari B.Mamadaliyevning harakatlarida Ma’muriy javobgarlik to‘g‘risidagi kodeksning 51-moddasi 1-qismida nazarda tutilgan huquqbuzarlik alomatlari o‘z tasdig‘ini topmaganligini e’tiborga olib, Toshkent viloyati Mehnat inspeksiyasi boshlig‘ining o‘rinbosari vazifasini bajaruvchi O‘tkir Tursunboyevning 2020-yil 3-iyundagi Baxtiyor Mamadaliyevga Ma’muriy javobgarlik to‘g‘risidagi kodeksning 51-moddasi 1-qismi bilan bazaviy hisoblash miqdorining 70 baravari, 15 million 610 ming so‘m jarima solish to‘g‘risidagi qarorini bekor qilish va unga nisbatan yuritilgan ma’muriy huquqbuzarlik to‘g‘risidagi ishni mazkur kodeksning 271-moddasi 1-bandiga asosan tugatishni lozim deb topgan.

Sudda da’vogar sifatida ishtirok etgan ikkinchi taraf vakili — Toshkent viloyati Mehnat inspeksiyasi boshlig‘ining o‘rinbosari vazifasini bajaruvchi O‘tkir Tursunboyevning ma’lum qilishicha, majburiy mehnat bilan bog‘liq bu ish inspeksiyaga xalq ta’limi vaziri Nazorat-huquqiy xizmati tomonidan barcha hujjatlar jamlangan holda taqdim etilgan.

“Vazirlikning amaliy chora ko‘rish bo‘yicha vakolati bo‘lmagani uchun ham ular shunday yo‘l tutgan. Mazkur xizmat tomonidan to‘plangan barcha dalillarni biz mustaqil ravishda tekshirib, guvohlarning fikrlarini olib, haqiqatan majburiy mehnat holatiga yo‘l qo‘yilganiga ishonch hosil qilganimizdan so‘ng Zangiota tumani hokimi o‘rinbosariga jarima jazosi qo‘llaganmiz”, — deya ma’lum qilgan O‘tkir Tursunboyev.

Uning qayd etishicha, sud majlisida mansabdor shaxsning o‘zi ham bevosita ishtirok etgani uchun ham ayrim guvohlar avvalgi ko‘rsatmalarini o‘zgartirgan. “Inobatga olinishi kerak bo‘lgan, rad qilib bo‘lmaydigan faktlarimiz bor. Shuning uchun ham biz bu ish bo‘yicha protest keltirilishi uchun prokuraturaga murojaat qildik. Ish kassatsiya instansiyasida ko‘rib chiqilishi uchun ham ariza topshirildi”, — dedi inspeksiya rahbari.