Айиқ DJ’нинг уйидаги мусиқий кечага ташриф буюрди, лекин эшикдан кира олмади (видео)

Шимолий каролиналик Жоди Флемминг ёввойи айиқ учун мусиқий кеча уюштирди, деб хабар бермоқда Meduza.

Флемминг дижейлик қилишни яхши кўради, шу сабабли уйида баъзан мусиқий кеча ташкиллаштириб, тингловчиларини мусиқалари билан баҳраманд қилиб туради. Кутилмаганда унинг шундай зиёфатларидан бирига айиқ «ташриф буюрди». Видеодан кўриш мумкинки, ҳайвон орқа эшикдан яширинча киришга ҳаракат қилган. Жониворга мусиқа ёққанга ўхшайди: у ҳатто дижейни яхшироқ томоша қилиш учун эшикка суяниб, орқа оёқларида тик туриб олган.

Бир дақиқага яқин Флемминг чақирилмаган меҳмонни пайқамаган. У қўшнисининг айиқни қўрқитиш учун бақирган овозини эшитгандагина орқасига ўгирилган. Бироқ ҳайвон дарҳол қочиб қолган. Дижейнинг айтишича, бундан у хафа бўлган — айиқ яна бироз турганида яхши бўларди.

Флеммингнинг сўзларига кўра, у айиқдан қўрқмаган. Биринчидан, у тоғдаги кичик шаҳарчада яшайди, бу ерда айиқлар тез-тез учраб туради. Ёввойи ҳайвонлар уникига ва қўшнилариникига доимий равишда келиб туради. Иккинчидан, Флемминг илгари боғда назоратчи бўлиб ишлаган ва иш пайтида ёввойи ҳайвонлар билан бир неча бор юзма-юз келишига тўғри келган.