4 февраль куни Александр Лукашенко мамлакатдаги дипломатик миссиясини якунлаётган Ўзбекистон элчиси Носиржон Юсупов билан учрашди. Бу ҳақда Беларусь раҳбари матбуот хизмати хабар берди.
Хабарда айтилишича, учрашув давомида Лукашенко элчига мамлакатлар тараққиётига қўшган ҳиссаси учун миннатдорлик билдирди. Унга соғлиқ ва Ўзбекистон манфаати йўлидаги ишларида муваффақият тилади.
«Бугунги кунда мамлакатларимиз ўртасида амалга оширилган барча ишлар, алоқаларни ривожлантиришда сезиларли ютуқлар, авваламбор, дўстим Шавкат Миромонович билан боғлиқ. Аминманки, у Ўзбекистон қадрлайдиган киши. Унинг мустақил Ўзбекистон ривожланишининг маълум бир давридан кейин қилишни бошлаган ишлари эртага ижобий натижа беради», — деган у.
Александр Лукашенко Носиржон Юсупов Беларусдаги миссиясини тугатгандан сўнг бошқа лавозимларда катта фойда келтиришига, шунингдек, Беларусь билан алоқаларни ривожлантиришга ҳисса қўшишига ишонч билдирган.
Носиржон Юсупов унинг фаолиятига берилган юқори баҳо учун Беларусь президентига миннатдорлик билдирган.
Эслатиб ўтамиз, Носиржон Юсупов 2018 йилнинг октябрь ойида Ўзбекистоннинг Беларусдаги фавқулодда ва мухтор элчиси этиб тайинланганди.
Мавзуга доир: Ватиканнинг Ўзбекистондаги янги элчиси тайинланди
Изоҳ (0)