Футбол бўйича Англия Премьер Лигаси 22-тури доирасида «Манчестер Сити» 3 февраль, чоршанба куни «Бёрнли» меҳмони бўлди ва 2:0 ҳисобида ғалаба қозонди.
Ушбу баҳсда «шаҳарликлар» дарвозасини Эдерсон Мораэс қўриқлади. Бу бразилиялик посбон учун АПЛдаги кетма-кет саккизинчи қуруқ ўйин бўлди.
«Манчестер Сити» АПЛда кетма-кет 8 та ўйинда 8 та ғалабани қайд этди. Тўплар нисбати эса 17:0. Эдерсон сўнгги бор АПЛ доирасида 2020 йил декабрида гол ўтказганди.
Эдерсон Премьер Лига тарихида кетма-кет 8 та қуруқ ўйин ўтказган бешинчи дарвозабон бўлди. Бу борада рекорд Эдвин ван дер Сарга тегишли — 14. Петр Чех, Алиссон ва Хосе Рейналар эса 8 тадан қуруқ ўйин ўтказган.
Маълумот учун, «Бёрнли»га қарши баҳсдаги ғалабадан сўнг Гвардиола жамоасининг очколари сони 47 тага етди. «Шаҳарликлар» захирасида битта ўйин бор ва жамоа мусобақа жадвалида иккинчи ўринда бораётган ҳамшаҳари «Манчестер Юнайтед»ни 3 очкога ортда қолдирган ҳолда якка пешқадам бўлиб турибди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)