Эрон, Россия ва Хитой 22 июль куни Теҳроннинг ядровий дастурига қайта жорий этилиши мумкин бўлган санкциялар борасида муҳокама ўтказади. Бу ҳақда Эрон ТИВга таяниб Al Arabiya хабар берди.
Европанинг 3 давлати: Буюк Британия, Франция ва Германия август ойи охиригача ядровий музокараларда олдинга силжиш бўлмаса, Теҳронга қайта санкциялар жорий этиш билан таҳдид қилаётган эди. Шу боис Россия ва Хитой Эрон билан бу мавзуни муҳокама қилишга келишиб олган.
Олдинроқ, Эрон ТИВ ўринбосарлари 25 июль куни Истанбулда Британия, Франция ва Германия билан ядровий музокаралар ўтказиши ҳақида хабар қилинганди. Эрон ТИВ матбуот котиби Исмоил Боғоийнинг таъкидлашича, ҳозирда Теҳрон АҚШ билан ядро музокараларини ўтказишни режалаштираётгани йўқ.
“Биз Европа Иттифоқи давлатлари билан муносабатларни юмшатиш ва потенциал санкцияларни олдини олиш устида доимий равишда иш олиб бормоқдамиз”, деган Бағоий.
Маълумот учун, Эрон 2015 йил 14 июлда 6 та давлат — АҚШ, Буюк Британия, Франция, Германия, Россия, Хитой билан “Ядро дастурини кенг қамровли режалаштириш келишувини”ни имзолаган. Келишув Эроннинг ядровий қурол ишлаб чиқариш имкониятини сезиларли даражада чеклаб, халқаро санкцияларни олиб ташланишига сабаб бўлганди. Бироқ 2018 йилда АҚШ президент Дональд Трампнинг келишувдан чиқиш қарори ва кейинги йилларда Эроннинг шартларни бузиши мамлакатлар орасида зиддият келтириб чиқармоқда.
Изоҳ (0)