Nike компанияси қўл ёрдамисиз кийиб-ечиш мумкин бўлган кроссовкалар тақдим қилди. Боғичлари бўлмаган мазкур пойабзални кийиш учун оёқларни унга тиқишнинг ўзи кифоя.
Nike GO FlyEase деб номланган моделнинг олд ва орқа қисми эластик лента ёрдамида уланган бўлиб, шарнир (ошиқ-мошиқ) механизми сабаб кроссовканинг товон қисми босилса, орқа томони олд қисми билан бирикади. Барча оёқ кийимлар текстиль мато ва технологик сеткадан ишланган. Таглигининг олд ва орқа қисмларига алоҳида-алоҳида урилиш ва зарбларни юмшатадиган ёстиқчалар ўрнатилган.
Янги кроссовкалар уч хил: оч рангда, тўқ кўк ва сиёҳранг аралаш рангда ҳамда қора рангларда тақдим қилинади. Nike дизайнерлари ушбу модель биринчи навбатда имконияти чекланганлар учун мўлжалланганлиги, аммо бошқалар учун ҳам қулайлик келтириб чиқаришини таъкидлаган.
GO FlyEase кроссовкаларини ишлаб чиқиш ва синаш жараёнида ҳомиладорлигининг сўнги даврида бўлган аёллар иштирок этган. Дизайнер ва паралимпиячи Сара Райнерцен супермаркет эшикларининг автомат очиб-ёпилиши жисмоний имконияти чекланган шахслар, боласини коляскада олиб юрадиган ва бошқалар учун қулайлигини айтиб, кроссовка ишлаб чиқаришдан мақсад ҳам шундай инсонлар ҳаётини осонлаштириш ва енгиллаштиришдан иборат эканлигини қўшимча қилган.
15 февралдан сотувга чиқарилиши кутилаётган пойабзалларни аввалига фақат Nike клубининг танланган аъзолари, 2021 йилнинг сўнгига келиб эса барча харид қилиши мумкин бўлади. Унинг тахминий нархи 210 долларни ташкил қилади.
Мавзуга доир:
- Adidas 80 йиллар фильмидан илҳомланиб, мўйнали кроссовкаларни сотувга чиқарди
- Кане Уэст Yeezy кроссовкаларининг янги модели сурати билан бўлишди. Пойабзал ижтимоий тармоқда мемга айланди
- Balenciaga 5390 долларлик кроссовкани тақдим этди. У кийишга мўлжалланмаган
- Reebok ўйинчоқ аскарчалардан илҳомланган ҳолда яратилган кроссовка моделини тақдим қилди
- Reebok ва BAIT «Ўйинчоқлар тарихи» мультфильмига бағишланган кроссовкаларни тақдим этди