2021 йил баҳорининг тенденциялари: янги мавсумда қандай пойабзаллар урфга киради? (фото)

Қишнинг сўнгги ойи кириб келиши билан баҳор мавсумига тайёргарлик кўрилади. Айниқса, аёллар қандай либос ва пойабзаллар урфга кириши ҳақида кўпроқ ўйланади ва мода олами билан боғлиқ янгиликларни кўздан қочирмайди. Шунинг учун ҳам қуйида янги мавсумда урфда бўлиши кутилаётган оёқ кийимлар ҳақидаги маълумотларни тақдим этамиз.

Олд қисми тўртбурчак оёқ кийим

Ушбу кўринишдаги оёқ кийимларни қишнинг қуёшли кунлари ҳамда баҳорда кийиш мумкин. Сабаби мазкур оёқ кийим совуқ ва ёмғирли ҳавога анча чидамли. Шунингдек, улар кўйлак ва кенг шимлар билан ҳам жуда яхши кўриниш ҳосил қилади.

Узун этиклар 

Қанчалик баланд бўлса, шунча яхши. Бу келаётган баҳорга жуда мос. Кўйлак ва чарм курткалар билан ажойиб уйғунликни ҳосил қилувчи узун этикларни қишнинг қуёшли кунларидан бошлаб кийиш тавсия этилади.

Тепа қисми кенг этиклар

Олд қисми учли оёқ кийимлар ҳеч қачон урфдан қолмайди. Ҳар қандай назокатли аёлда ҳеч бўлмаса бир дона бу каби кўринишдаги оёқ кийим ёки туфли мавжуд. Ўтган асрнинг 80—90 йилларига хос бўлган тепа қисми бироз кенгроқ ва олд қисми учбурчак шаклдаги этикларнинг урфда бўлиши жуда яхши. Шунингдек, баҳорий либослар билан янги комбинацияларни яратиш имконияти пайдо бўлади.

Казаклар

Ноодатий пошна ва ажойиб олд қисми билан кўпчиликнинг дидига маъқул келган ушбу этиклар ҳам урфда. Ковбойлар услубини ёдга солувчи бу каби кўриниш қўшимча безаклар билан ажойиб дизайнга эга урфга монанд этикни ҳосил қилди.

Бойлагичли ботинкалар

Спорт услубини хуш кўрувчилар учун ушбу турдаги ботинкалар жуда мос келади, аммо шим ёки спорт кийими билан эмас, аксинча кенг ва ҳарир кўйлаклар билан. Ушбу ботинкалардан узоғи билан яна 2-3 ой фойдаланиш мумкин. Айтганча, қора рангли ботинкалардан чекиниб, кўк, жигарранг, қаймоқ ва хантал рангларга мурожаат қилиш тавсия этилади.

Пайпоқ-этиклар

Бир неча йил аввал кроссовкаларнинг айнан ушбу услубдагиси урфга кирган эди. Орадан кўп ўтмай нозик дидли хонимлар учун ҳам уларнинг этик кўринишидагилари ишлаб чиқарилди. Тепа қисми трикотаж бўлган этиклар костюм ва севимли либосга ажойиб қўшимча бўлади. Балки ушбу модель баҳорнинг асосий тенденциясига ҳам айланиши мумкин.

Ботинкалар 

Ушбу услубдаги ботинкалар нафақат эркакларнинг, балки аёлларнинг ҳам севимли оёқ кийимига айланган. Уларни расмий ишхоналар ёки кундалик учун ҳам кийиш мумкин. Фақат ранг борасида бироз янгилик яратиш зарур. Шунингдек, ушбу моделлар расмий услубни янада бойитади ҳамда баҳор мавсуми учун энг яхши танлов ҳисобланади.