Қора рангли жемфер-водолазка деярли барча аёл қизнинг гардеробида бўлишига қарамай, кўпчилик уни жинси билан кийиб чеклангани сабаб образ зерикарли кўринади. Футболчи Дэвид Бекҳэмнинг рафиқаси, дизайнер Виктория эса бу борада бошқача танлов қилади.
У оддийликка оч сариқ плиссировкали юбка билан урғу берган ва ўзига хос кўринишга эга бўлган.
Шунингдек, Виктория қора свитер билан башанг кийинишни ҳам қойиллатади. Бунинг учун шакли қаламни эсга соладиган ёки ноодатий бичимли юбкани танлашни афзал билади.
Бошдан оёқ бир рангда кийиниш ҳам дидли ва жозибали кўрсатади. Бекҳэм хонимнинг тўқ кўк рангли жемферга сипо юбкани мослагани эса бунинг мисоли.
Яна бир вариант эса тўқ рангли жемфер ва унга мос рангли этик билан пушти ранг шифондан юбка кийиш.
Оқ кенг ёки трикотаж матосидан тикилган свитерни эса ранг-баранг принтли юбка ва пойабзал билан уйғунлаштирса бўлади.
Мослаш учун фақат оқ ранг бўлиши шарт эмас. Ёрқин рангли юбкадаги принт рангида устки кийим кийса ҳам бўлади.
Свитерни фақат кундалик образ, иш ва ўқиш учун кийиш керак, деб ким айтди? Унга ипак матодан тикилган узун юбка мослаб ҳеч иккиланмай оқшомдаги ёки алоҳида тадбирларга борса бўлади. Қўшимча аксессуар ва деталлар билан эса образни янада қизиқарли кўрсатса бўлади.
Изоҳ (0)