Дунё бўйлаб 2020 йили ҳаво рейслари сони 2003 йил даражасига қайтди, йўловчиларнинг умумий сони 2019 йилга нисбатан 60 фоизга камайди, деб хабар берди «Теngritravel.kz» сайти Travel Daily Мedia’га асосланиб.
Халқаро фуқаро авиацияси ташкилоти (ICАО) маълумотларига кўра, 2019 йилда йўловчи ташишнинг умумий ҳажми 4,5 миллиард кишини ташкил этган бўлса, 2020 йилда бу кўрсаткич деярли уч бараварга камайиб, атиги 1,8 миллиард йўловчи ҳавога кўтарилди.
Авиакомпанияларнинг молиявий зарарлари, экспертларнинг фикрига кўра, 370 миллиард долларни ташкил этди. Аэропортлар 115 миллиард, аэронавигация хизматларини етказиб берувчилар (АNSP) 13 миллиард доллар йўқотди.
Халқаро фуқаро авиацияси ташкилотида таъкидланишича, ҳаво қатновининг қисқариш тенденциясини 2020 йил январь ойида сезиш мумкин эди, аммо бу фақат бир нечта мамлакатларга тегишли бўлган. Март ойи охирида ҳаво транспорти фаолияти деярли тўхтади. Апрель ойида деярли барча мамлакатлар қаттиқ чекловлар ўрнатди, фуқароларни ўзларини изоляция қилишга чақирди ва чегараларини ёпди. Шундан сўнг йўловчилар сони 2019 йилга нисбатан 92 фоизга, ички ҳаво қатнови 87 фоизга камайди.
Ёзда йўловчилар айланмаси тиклана бошлади, аммо кузда бир қатор мамлакатлар коронавируснинг иккинчи тўлқинига дуч келди ва чекловларга қайтди.
Халқаро фуқаро авиацияси ташкилотининг таъкидлашича, коронавирус билан боғлиқ вазият озми, кўпи барқарорлашиши биланоқ мамлакатларда ички рейслар ўсишни бошлади. Бу, айниқса, Хитой ва Россияда сезилди. У ерда ички йўловчи ташиш аллақачон пандемиядан олдинги даражасига қайтган.
Изоҳ (0)