O‘zbekistonlik olimlar COVID-19’ning “britancha” shtammini aniqlovchi test tizimini yaratish ustida ish olib bormoqda. Bu haqda innovatsion rivojlanish vazirining birinchi o‘rinbosari Shahlo Turdiqulova Yaponiyaning O‘zbekistondagi elchixonasi muvaqqat ishlar vakili Asushi Suda bilan o‘tkazilgan muzokara davomida ma’lum qildi.

Foto: Innovatsion rivojlanish vazirligi

Uchrashuv davomida innovatsion rivojlanish vaziri birinchi o‘rinbosari vazirlik tomonidan koronavirusga qarshi kurash bo‘yicha amalga oshirilayotgan ishlarga to‘xtalib o‘tgan. Xitoyning Anhui ZhifeiLongcom Biopharmaceutical kompaniyasi tomonidan ishlab chiqilgan koronavirusga qarshi vaksinaning III faza klinik sinovlarini o‘tkazish jarayoni, koronavirusni aniqlovchi PZR test tizimlari ishlab chiqarilayotgani, O‘zbekistonda koronavirusga qarshi kurashga doir ilmiy tadqiqotlar haqida ma’lumotlar bergan. Mazkur tadqiqotlarni amalga oshirishda Yaponiyaning ushbu sohadagi ilmiy-tadqiqot tashkilotlari va kompaniyalari bilan hamkorlikka tayyorligini bildirib o‘tgan.

Shahlo Turdiqulova Innovatsion rivojlanish vazirligi qoshidagi Ilg‘or texnologiyalar markazi tomonidan PZR test tizimlarini yaratish va ishlab chiqarish yo‘lga qo‘yilganini, ushbu markaz olimlari tomonidan COVID-19’ning “britancha” shtammini aniqlovchi test tizimini yaratish ustida ish olib borilayotganini ma’lum qilgan.

“Yaponiya elchixonasi vakillari bilan ushbu tadqiqotlarni amalga oshirishda hamkorlik qiluvchi yapon tashkilotlari va kompaniyalarini topishda amaliy ko‘mak berish masalasini ko‘rib chiqishga kelishib olindi”, — deyiladi xabarda.

Eslatib o‘tamiz, 2020-yil mart oyining oxirlarida Ilg‘or texnologiyalar markazi olimlari koronavirusni aniqlash bo‘yicha test tizimi ishlab chiqqani, mayda esa mazkur markaz olimlari koronavirusga chalinganlar genidagi DNK ketma-ketligini aniqlagani haqida xabar berilgandi.